ویسٹ انڈیز نے دوسری اننگز میں آسٹریلیا کے چار وکٹ لے کر میچ پر بنائی گرفت

برج ٹاؤن (بارباڈوس)// تیز گیند بازوں کے لیے سازگار پچ پر جیڈن سیلز کی قیادت میں ویسٹ انڈیز کے گیند بازوں نے پہلے ٹیسٹ میچ کے دوسرے دن اسٹمپ پر دوسری اننگز میں 92 رن کے اسکور پر آسٹریلیا کے چار وکٹ لے کر میچ پر اپنی گرفت مضبوط بنالی۔
اس سے قبل ویسٹ انڈیز نے بلے باز شائی ہوپ (48) اور کپتان روسٹن چیز (44) کے درمیان جدو جہد سے بھری پارٹنرشپ کی بدولت پہلی اننگز میں آسٹریلیا کے اسکور کی بنیاد پر 10 رنز کی برتری حاصل کی۔ دوسری اننگز میں بیٹنگ کے لیے آنے والے آسٹریلیا کی شروعات ایک بار پھر خراب رہی اور اس نے 27 کے اسکور پر عثمان خواجہ (15) کا وکٹ گنوادیا۔اس کے بعد آسٹریلیا کا دوسرا وکٹ 34 کے اسکور پر سیم کونسٹاس (پانچ) کی صورت میں گرا، جوش انگلس (12) کو جیڈن سیلز نے بولڈ کیا۔ کیمرون گرین (15) کو جسٹن گریوز نے روسٹن چیز کے ہاتھوں کیچ آؤٹ کرایا۔ آسٹریلیا 65 رنز پر چار وکٹ گنوانے کے بعد دباؤ میں تھا۔ بحران کے ایسے وقت میں ٹریوس ہیڈ اور بیو ویبسٹر کی جوڑی نے اننگز کو سنبھالا اور دن کا کھیل ختم ہونے تک چار وکٹوں کے نقصان پر 92 رنز بنائے۔ اسٹمپ کے وقت بو ویبسٹر (19 ناٹ آؤٹ) اور ٹریوس ہیڈ (13 ناٹ آؤٹ) کریز پر موجود تھے۔
ویسٹ انڈیز کی جانب سے جیڈن سیلز، شمر جوزف، الزاری جوزف اور جسٹن گریویز نے ایک ایک بلے باز کو آؤٹ کیا۔
ویسٹ انڈیز کے گیند بازوں نے آسٹریلیا کو پہلی اننگز میں 56.5 اوورز میں 180 کے اسکور تک سمیٹ دیا۔ اس کے بعد بیٹنگ کے لیے آنے والی ویسٹ انڈیز نے پہلی اننگز میں شائی ہوپ (48) اور کپتان روسٹن چیز (44) کی بدولت 190 رنز بنائے اور پہلی اننگز میں 10 رنز کی برتری حاصل کی تھی۔