ایف آئی ایچ ہاکی مینز جونیئر ورلڈ کپ کے لوگو کی رونمائی

چنئی// ہاکی انڈیا اور تمل ناڈو حکومت نے جمعرات کو ایف آئی ایچ ہاکی مردوں کے جونیئر ورلڈ کپ 2025 کے آفیشل لوگو کی نقاب کشائی کی۔
آج یہاں منعقدہ تقریب میں ہاکی انڈیا نے ایف آئی ایچ ہاکی مینز جونیئر ورلڈ کپ تمل ناڈو 2025 کی میزبانی کے لیے تمل ناڈو حکومت کے ساتھ ایک تاریخی مفاہمت کی یادداشت (ایم او یو) پر دستخط کیے اور آج ٹورنمنٹ کے لوگو کی باضابطہ نقاب کشائی بھی کی۔
28 نومبر سے 10 دسمبر 2025 تک منعقد ہونے والے دو ہفتے کے ٹورنامنٹ کی مشترکہ میزبانی چنئی اور مدورائی شہروں میں کی جائے گی۔ پہلی بار اس ٹورنامنٹ میں دنیا بھر سے 24 ٹیمیں حصہ لیں گی۔
اس موقع پر تمل ناڈو کے نائب وزیر اعلیٰ تھیرو ادھیانیدھی اسٹالن نے کہا، "ہمیں فخر ہے کہ تمل ناڈو کوایف آئی ایچ ہاکی مینز جونیئر ورلڈ کپ 2025 کی میزبانی کے لیے منتخب کیا گیا ہے۔ یہ نہ صرف ہماری ریاست کے لیے، بلکہ پورے ملک کے لیے ایک قابل فخر لمحہ ہے۔ اس طرح کے باوقار بین الاقوامی ٹورنامنٹ کی میزبانی کرنا ہر سطح پر کھیل کو تعاون اورترقی دینے کے ہمارے عزم کی عکاسی کرتا ہے۔”
ہاکی انڈیا کے سکریٹری جنرل بھولا ناتھ سنگھ نے کہا، "چوتھی بار ایف آئی ایچ ہاکی مینز جونیئر ورلڈ کپ کی میزبانی کرنا ایک اعزاز کی بات ہے اور بڑے کھیلوں کے مقابلوں کے ایک پر اعتماد اور پرجوش میزبان کے طور پر ہندوستان کی بڑھتی ہوئی ساکھ کا ثبوت ہے۔ یہ ٹورنامنٹ نوجوانوں، ٹیلنٹ اور عالمی ہاکی کمیونٹی کا جشن ہے۔ اس ایڈیشن میں 24 ٹیموں کی شمولیت کھیل کی بڑھتی ہوئی رسائی کی عکاسی کرتی ہے اور ہم ہر براعظم سے بہترین جونیئر ٹیلنٹ کا استقبال کرنے کے لیے پرجوش ہیں۔