سی آر پی ایف کیمپ حملہ: این آئی اے نے 17 ملزمین کے خلاف چارج شیٹ داخل کی

نئی دہلی// قومی تحقیقاتی ایجنسی (این آئی اے ) نے چھتیس گڑھ میں سنٹرل ریزرو پولیس فورس (سی آر پی ایف) کے کیمپ پر 2024 میں ہوئے حملے کے 17 ملزمین کے خلاف چارج شیٹ داخل کی ہے ۔
ان ملزمان کا تعلق کمیونسٹ پارٹی آف انڈیا (ماؤ نواز) سے ہے اور ان میں سے 16 فرار ہیں۔
این آئی اے نے ہفتہ کو کہا کہ کل ملاکر 17 ملزمین میں سے ایک کو گرفتار کر لیا گیا ہے اور اس کی شناخت سودی بامن عرف دیول کے طور پر کی گئی ہے ۔
جگدل پور میں این آئی اے کی خصوصی عدالت میں داخل کی گئی چارج شیٹ میں تمام ملزمان پر تعزیرات ہند، اسلحہ ایکٹ، دھماکہ خیز مواد ایکٹ اور غیر قانونی سرگرمیاں (روک تھام) قانون کی مختلف دفعات کے تحت فرد جرم عائد کی گئی ہے ۔
حملہ آوروں نے کیمپ سے سیکورٹی فورسز کے ہتھیار اور دیگر سامان لوٹنے کی کوشش کی تھی۔ دھرمااورم سی آر پی ایف کیمپ پر حملے میں 12 جوان زخمی ہوئے تھے ۔
این آئی اے نے گزشتہ سال 9 فروری کو مقامی پولیس سے کیس اپنے ہاتھ میں لیا تھا اور ممنوعہ دہشت گرد تنظیم سی پی آئی (ماؤسٹ) کے 21 نامزد اور 250 سے 300 نامعلوم مسلح کیڈروں کے خلاف معاملہ درج کیا تھا۔
تحقیقات سے پتہ چلا کہ چارج شیٹ میں نامزد ملزمان جمہوری طور پر منتخب مرکزی حکومت کے خلاف جنگ چھیڑنے کی مجرمانہ سازش کے تحت نوجوانوں کو بھرتی کرنے میں ملوث تھے ۔ ان کے پاس ممنوعہ اسلحہ، گولہ بارود اور دھماکہ خیز مواد تھا اور وہ سازشی میٹنگوں کا اہتمام اور شرکت کرتے تھے ۔ معاملے کی تفتیش جاری ہے ۔