محروم طبقوں کے بچوں کی تعلیم کے سلسلے میں مودی کو راہل کا خط

نئی دہلی//کانگریس کے سابق صدر اور لوک سبھا میں اپوزیشن لیڈر راہل گاندھی نے وزیر اعظم نریندر مودی کو خط لکھ کر محروم طبقوں کے بچوں کی تعلیم بلا رکاوٹ جاری رکھنے کے لیے ضروری اقدامات کرنے کا مطالبہ کیا ۔
مسٹر راہل گاندھی نے 10 جون کو مسٹر نریندر مودی کو لکھے گئے خط میں کہا کہ محروم طبقات کے 90 فیصد طلبہ کو تعلیمی مواقع میں رکاوٹوں کا سامنا ہے اور یہ بچے بغیر کسی رکاوٹ کے اپنی تعلیم حاصل کرنے پر قادر نہيں ہیں۔
انہوں نے دلت، قبائلی، معاشی طور پر کمزور اور اقلیتی طبقوں کے طلبہ کے رہائشی ہاسٹلوں کی انتہائی ابتر حالت کو ان طبقات کے طلبہ کی تعلیم میں رکاوٹ قرار دیا ہے۔ اپنے حالیہ دورہ بہار کے دوران دربھنگہ کے امبیڈکر ہاسٹل کا ذکر کرتے ہوئے انہوں نے کہا کہ وہاں چھ سات طلبہ کو ایک کمرے میں بند رکھا جاتا ہے۔ ہاسٹل میں انتہائی گندے بیت الخلاء، پینے کا غیر محفوظ پانی، کھانے کا ناقص معیار اور تعلیمی وسائل کا فقدان جیسے سنگین حالات ہیں۔
مسٹر راہل گاندھی نے الزام لگایا کہ پسماندہ طبقات کے طلبہ کے لئے پوسٹ میٹرک اسکالرشپ جاری کرنے میں تاخیر ہو رہی ہے۔ انہوں نے کہا کہ حکومت ان طبقات کے بچوں کو سہولیات فراہم کرنے میں ناکام ہو رہی ہے۔ ان طبقات کے طلبہ کو میٹرک کے بعد وقت پر وظائف نہیں مل رہے ہیں۔ انہوں نے ریاست بہار کی مثال دیتے ہوئے کہا کہ اسکالرشپ پورٹل تین سال تک بند رہا اور 22-2021 میں کسی بھی طالب / طالبہ کو اسکالرشپ نہیں ملی۔
انہوں نے کہا کہ اگر ملک کو ترقی کی راہ پر لے جانا ہے تو پسماندہ طبقے پر توجہ دینی ہو گی اور اگر پسماندہ طبقے کی صحیح طریقے سے ترقی ہو گی تو ملک خود بخود ترقی کی راہ پر گامزن ہو جائے گا۔