نائیجیریا میں سیلاب سے مرنے والوں کی تعداد 100 ہو ئی

ابوجہ//
نائجیریا کی شمالی وسطی نائیجر ریاست میں شدید بارشوں سے آئے تباہ کن سیلاب میں مرنے والوں کی تعداد 100 ہو گئی ہے۔
نیشنل ایمرجنسی مینجمنٹ ایجنسی (این ای ایم اے) کے افسران نے جمعہ کو یہ اطلاع دی۔ این ای ایم اےکے سینئر افسران نے ژنہوا کو ٹیلی فون پر بتایا کہ آفت زدہ موکوا علاقے کا معائنہ کرنے گئے اہلکاروں نے کل دوپہر مزید لاشیں برآمد کیں۔
افسر نے نام ظاہر نہ کرنے کی شرط پر بتایا ’’اب تک کم از کم 100 لاشیں نکالی جا چکی ہیں۔
واضح رہے کہ افسران نے جمعرات کو صحافیوں کو بتایا تھا کہ موکوا میں بدھ کی دیر رات موسلادھار بارش نے تباہی مچا دی، جس کی وجہ سے 50 سے زیادہ مکانات زیر آب آگئے یا بہہ گئے۔ ان گھروں میں لوگ رہائش پذیر تھے۔
اس ہفتے کے شروع میں، محکمہ موسمیات نے نائیجر سمیت ملک کے وسطی علاقے میں گرج چمک اور تیز بارشوں کی وارننگ جاری کی تھی۔ آئندہ 48 گھنٹوں میں مزید بارش کا امکان ہے۔ جنوبی علاقوں میں بھی مقامی سطح پر موسلادھار بارش کے آثار ہیں۔
این ای ایم اے نے کہا کہ سیلاب کے پھیلاؤ کو روکنے کے لیے ملک بھر میں کوششیں تیز کر دی گئی ہیں۔
اس دوران سیلاب کی تیاری کے بارے میں ایک قومی بیداری مہم کے دوران، این ای ایم اے کی ڈائریکٹر جنرل زبیدہ عمر نے تمام سرکاری محکموں اور اداروں سے اپیل کی ہے کہ وہ دریائی علاقوں میں پانی کی نکاسی کے نظام، ڈیموں اور سیلاب سے بچنے والے بنیادی ڈھانچے میں سرمایہ کاری کریں۔