حج قوانین کی خلاف ورزی پر 20 افراد گرفتار، سخت سزا سنادی گئی

مکہ مکرمہ//
سعودی عرب میں حج قوانین کی خلاف ورزی پر بغیر اجازت نامے مکہ مکرمہ میں جانے کی کوشش کرنے والے 20 افراد کو گرفتار کرلیا گیا ہے۔
رپورٹ کے مطابق سعودی وزارتِ داخلہ نے حج قوانین کی خلاف ورزی پر 12 غیر ملکیوں سمیت 8 سعودی شہریوں کو سزا سنادی گئی۔
سعودی وزارتِ داخلہ کا کہنا ہے کہ یہ افراد بغیر اجازت نامے کے 60 افراد کو حج کرانے کی کوشش میں مکہ مکرمہ کے داخلی راستوں پر تعینات حج سیکیورٹی فورسز کے ہاتھوں گرفتار ہوئے ہیں۔
ملزمان پر عائد کردہ سزاؤں میں قید، ایک لاکھ ریال جرمانہ، غیر قانونی نقل و حمل میں استعمال ہونے والی گاڑیوں کی ضبطی، غیر ملکیوں کی ملک بدری، اور سزا مکمل ہونے کے بعد دس سال کے لیے سعودی عرب میں دوبارہ داخلے پر پابندی شامل ہے۔
وزارتِ داخلہ نے تمام شہریوں اور رہائشیوں پر زور دیا ہے کہ وہ حج کے ضوابط اور ہدایات کی مکمل پابندی کریں تاکہ حجاج کرام کی سلامتی اور حفاظت کو یقینی بنایا جا سکے اور وہ سہولت اور اطمینان کے ساتھ اپنے مناسکِ حج ادا کر سکیں۔
واضح رہے کہ اس سے قبل بھی سعودی عرب میں حج سیکیورٹی فورسز نے ’مکہ پرمٹ‘ کے بغیر 22 افراد کو غیرقانونی طورپر مکہ لے جانے کی کوشش کرنے والے مصری شہری کو حراست میں لے لیا۔