انتظار ختم، 24 مئی کو ہندوستان کی ٹیسٹ کرکٹ ٹیم کے کپتان کا ہوگا اعلان

نئی دہلی///
روہت شرما کے ذریعہ ٹیسٹ فارمیٹ سے اچانک ریٹائرمنٹ کا اعلان کیے جانے کے بعد ہندوستانی ٹیم کے سامنے انگلینڈ دورہ سے قبل سب سے بڑا چیلنج کپتان کے انتخاب کا ہے۔ میڈیا رپورٹس میں بتایا جا رہا ہے کہ ہندوستانی ٹیم کے چیف سلیکٹر اجیت اگرکر اور ہیڈ کوچ گوتم گمبھیر 24 مئی کو ایک پریس کانفرنس کریں گے۔
اسی دوران نئے ٹیسٹ کپتان کے نام کا اعلان بھی کیا جائے گا۔ نئے کپتان کے انتخاب پر تمام لوگوں کی نگاہیں مرکوز ہیں۔ سبھی کے ذہن میں یہ سوال چل رہا ہے کہ انگلینڈ جیسے اہم دورہ سے قبل کپتانی کی ذمہ داری کسے سونپی جائے گی۔
روہت شرما کے استعفیٰ کے بعد سے ہی لوگوں نے نئے ٹیسٹ کپتان کے حوالے سے اپنی رائے دینی شروع کر دی ہے۔ اب تک جن کھلاڑیوں کے متعلق قیاس آرائیاں جاری ہیں، ان میں شبھمن گل کا نام سرفہرست ہے۔
گل کے علاوہ ٹیسٹ کے نائب کپتان جسپریت بمراہ اور رشبھ پنت کا نام بھی اس فہرست میں شامل ہے۔ انگلینڈ کے خلاف 5 ٹیسٹ میچوں کی طویل سیریز سے قبل ہی ہندوستانی ٹیسٹ ٹیم کے کپتان روہت شرما نے کپتانی کے ساتھ ساتھ اس فارمیٹ کو بھی الوداع کہہ دیا۔
روہت شرما کے ریٹائرمنٹ کے بعد لوگ قیاس آرائی کر رہے تھے کہ سابق کپتان اور ٹیم کے سینئر کھلاڑی وراٹ کوہلی کو کپتانی کی ذمہ داری دی جائے گی۔ لیکن اچانک وراٹ کوہلی نے بھی اس طویل فارمیٹ کو خیرباد کہہ دیا۔
قابل ذکر ہے کہ ہندوستان کے نئے ورلڈ ٹیسٹ چمپئن شپ سائیکل کی شروعات انگلینڈ دورے سے ہو رہی ہے۔ اس کی شروعات 20 جون سے ہونے والی ہے، ہندوستانی ٹیم کو انگلینڈ دورے پر 5 ٹیسٹ میچوں کی سیریز کھیلنی ہے۔
ہندوستانی ٹیم کے سامنے کپتان کے انتخاب کے ساتھ ساتھ اوپننگ اور چوتھے نمبر پر بلے بازی کرنے کے لیے مناسب کھلاڑی کا انتخاب بھی کسی آزمائش سے کم نہیں۔ کیونکہ روہت شرما یشسوی جیسوال کے ساتھ اوپننگ کی ذمہ داری نبھا رہے تھے اور وراٹ کوہلی ایک طویل عرصے سے چوتھے نمبر پر بلے بازی کر کے ٹیم کے توازن کو برقرار رکھے ہوئے تھے۔