ریکھا دہلی کی ترقی کے معاملے پر جھوٹے بیان دے رہی ہیں: یادو

نئی دہلی// دہلی پردیش کانگریس کے صدر دیویندر یادو نے ریاست کی سابقہ حکومتوں کے بارے میں وزیر اعلیٰ ریکھا گپتا کے بیان کو ہدف تنقید بناتے ہوئے کہا کہ وہ قومی دارالحکومت کی ترقی کے معاملے پر غلط بیانات دے رہی ہیں۔
مسٹر یادو نے یہ بات وزیر اعلیٰ کے اس بیان پر ردعمل ظاہر کرتے ہوئے کہی جس میں انہوں نے کہا تھا کہ گزشتہ 27 سالوں میں ریاست کی سابقہ حکومتوں نے دہلی کے حالات کو خراب کر دیا ہے ۔ انہوں نے پیر کو یہاں میڈیا کے نمائندوں کو بتایا کہ ان کا یہ بیان بھارتیہ جنتا پارٹی (بی جے پی) کے سینئر لیڈروں کے بیانات کی لفظی نقل ہے جس میں وہ کہتے ہیں کہ ملک میں 70 سالوں میں کوئی ترقیاتی کام نہیں ہوا ہے ۔
انہوں نے کہا کہ مسز گپتا کی طرف سے دہلی میں کانگریس کے 15 سال کے دور میں ہوئی ترقی کو نظر انداز کرنے کا جو بیان دیا گیا ہے وہ پوری طرح سے غیر ذمہ دارانہ ہے اور کام نہ کرنے کے ان کے ارادے کو ظاہر کرتا ہے ۔
مسٹر یادو نے عام آدمی پارٹی (اے اے پی) پر بھی حملہ کیا اور کہا کہ دہلی کی حالت گزشتہ 11-12 سالوں میں خراب ہوئی ہے ، اس سے انکار نہیں کیا جاسکتا۔ دہلی بے روزگاری اور مہنگائی سے دوچار ہے ، جس کے لیے آپ کے ساتھ ساتھ بی جے پی بھی برابر کی ذمہ دار ہے کیونکہ 2014 سے مرکز میں بی جے پی حکومت کر رہی ہے ۔