شاہ نے نیا او سی آئی پورٹل لانچ کیا

نئی دہلی// مرکزی وزیر داخلہ امت شاہ نے کہا ہے کہ ہندوستان اوورسیز سٹیزن آف انڈیا کارڈ رکھنے والے اصل شہریوں کو عالمی معیار کی امیگریشن سہولیات فراہم کرنے کی مسلسل کوششیں کر رہا ہے ۔
مسٹر شاہ نے پیر کو یہاں نئے اوورسیز سٹیزن آف انڈیا (او سی آئی) پورٹل لانچ کیا۔ اس موقع پر مرکزی داخلہ سکریٹری اور انٹیلی جنس بیورو کے ڈائریکٹر سمیت وزارت داخلہ کے سینئر افسران موجود تھے ۔
مسٹر شاہ نے کہا کہ نئے پورٹل کو اپ ٹو ڈیٹ یوزر انٹرفیس کے ساتھ لانچ کیا گیا ہے تاکہ بیرون ملک مقیم شہریوں کی آسانی سے رجسٹریشن کی سہولت فراہم کی جاسکے ۔ انہوں نے کہا کہ ہندوستانی نژاد شہری دنیا کے کئی ممالک میں رہتے ہیں اور ہمیں اس بات کو یقینی بنانا چاہئے کہ ہندوستان آنے اور یہاں قیام کے دوران انہیں کسی قسم کی تکلیف کا سامنا نہ کرنا پڑے ۔
نیا پورٹل 50 لاکھ سے زیادہ موجودہ او سی آئی کارڈ ہولڈرز اور نئے صارفین کے لیے بہتر فعالیت، بہتر سیکیورٹی اور صارف دوست تجربہ فراہم کرے گا۔
اوورسیز سٹیزن آف انڈیا (او سی آئی) کارڈ ہولڈر اسکیم 2005 میں شہریت ایکٹ، 1955 میں ترمیم کے ذریعے متعارف کرائی گئی تھی۔ اس اسکیم میں ہندوستانی نژاد افراد کی بطور اوورسیز سٹیزن آف انڈیا رجسٹریشن فراہم کی گئی ہے بشرطیکہ وہ 26 جنوری، 1950 کو یا اس کے بعد ہندوستان کے شہری ہوں، یا وہ شہری بننے کے اہل ہوں۔ وہ افراد جو خود، ان کے والدین، دادا دادی اور پردادا پاکستان یا بنگلہ دیش کے شہری ہیں یا رہے ہیں اہل نہیں ہیں۔
او سی آئی سیوا پورٹل کو 2013 میں تیار کیا گیا تھا اور آج یہ بیرون ملک 180 سے زیادہ ہندوستانی مشنوں کے ساتھ ساتھ 12 غیر ملکی علاقائی رجسٹریشن دفاتر میں کام کر رہا ہے ۔ پچھلی دہائی میں کی گئی اہم تکنیکی ترقیوں اور کارڈ ہولڈرز سے موصول ہونے والی تجاویز کو مدنظر رکھتے ہوئے نئے او سی آئی پورٹل کو موجودہ کمیوں کو دور کرنے اور صارفین کے تجربے کو بڑھانے کے لیے تیار کیا گیا ہے ۔