جموںکشمیر کے ڈاکٹروں کا شمار دنیا کے بہترین ڈاکٹروں میں ہوتا ہے :عابد رشید

سرینگر//
صحت اور طبی تعلیم کے سکریٹری ڈاکٹر سید عابد رشید کا کہنا ہے کہ جموں وکشمیر کے ڈاکٹروں کا شمار دنیا کے بہترین ڈاکٹروں میں ہوتا ہے ۔
رشید نے ان باتوں کا اظہار جمعہ کے روز سرینگر میں منعقدہ۵۲ویں انڈین ایسوسی ایشن آف پریونٹیو اینڈ سوشل میڈیسن (آئی اے پی ایس ایم) کانفرنس کے موقع پر میڈیا سے بات چیت کرنے کے دوران کیا۔
سیکریٹری نے امید ظاہر کی کہ اس تاریخی تقریب کے نتائج قومی صحت کی پالیسی کو تشکیل دینے اور ملک میں احتیاطی سماجی ادویات کو مضبوط بنانے کیلئے مدد گار ثابت ہوں گے ۔
رشید کا کہنا تھا کہ گورنمنٹ میڈیکل کالج سرینگر کے زیر اہتمام اس کانفرنس میں ہندوستان بھر سے اعلیٰ طبی میدان کے بہترین ذہنوں‘پالیسی سازوں اور صحت کے پیشہ ور افراد کو اکٹھا کیا گیا ہے ۔
سیکریٹری نے کہا کہ فزیکل اور ورچوئل دونوں طریقوں سے ایونٹ میں ۵۵۰سے زیادہ تحقیقی مقالے پیش کیے گئے ہیں۔
رشید نے کہا’’یہ ملک کے طبی میدان کے بہترین دماغوں کا اکیڈمک اجتماع ہے ۔ ہمارے پاس ہر ریاست اور مرکز کے زیر انتظام علاقے سے شرکاء موجود ہیں‘‘۔
انہوں نے جموں و کشمیر میں ایسی قومی کانفرنسوں کی میزبانی کی اہمیت پر زور دیتے ہوئے کہا’’سرینگر میں سیاحوں کی تعداد میں بھی اضافہ دیکھا جا رہا ہے اور اس نوعیت کی کانفرنسز اس تناظر میں بھی مثبت نتاج کا باعث بن سکتی ہیں۔‘‘