میزبان پاکستان کی ٹیم کا سفر بغیر کسی جیت کے اختتام پذیر ہوگیا

لاہور//آئی سی سی چیمپئنز ٹرافی 2025 کی دفاعی چیمپئن اور میزبان ٹیم پاکستان کا سفر بغیر کسی جیت کے اختتام پذیر ہوگیا۔
پاکستانی ٹیم کےلیے آئی سی سی کا یہ ایونٹ انتہائی تباہ کن جبکہ مداحوں کےلیے مایوس کن رہا۔ پاکستان کی ٹیم اپنے اعزاز کے دفاع میں ایک میچ نہ جیت سکی۔
دفاعی چیمپئنز کو گروپ اسٹیج کے دوران پہلے میچ میں نیوزی لینڈ نے جبکہ دوسرے میچ میں ہندوستان نے باآسانی ہرادیا۔
دو میچز میں شکست کے بعد پاکستان کی ٹیم پہلے ہی ایونٹ میں سیمی فائنل کی دوڑ سے باہر ہوچکی تھی، تاہم اسے اپنا آخری گروپ میچ بطور رسمی کارروائی بنگلادیش کے خلاف راولپنڈی میں کھیلنا تھا۔
راولپنڈی میں مسلسل بارش کے باعث پاکستان اور بنگلادیش کا میچ منسوخ کردیا گیا اور دونوں ٹیموں کو ایک ایک پوائنٹ دے دیا گیا جس کے ساتھ ہی ٹیم بغیر کسی جیت کے ایونٹ سے باہر ہوگئی۔
پاکستان کے علاوہ ایونٹ میں شریک دیگر 7 ٹیموں کے بلے بازوں نے کم از کم ایک سنچری اسکور کر ڈالی۔ تاہم یہاں دلچسپ بات یہ ہے کہ پاکستان کی ٹیم کا کوئی کھلاڑی اپنے گزشتہ دو میچز میں سنچری اسکور نہ کرسکا۔
خیال رہے کہ گروپ اے سے بھارت اور نیوزی لینڈ نے سیمی فائنل کیلئے کوالیفائی کرلیا ہے، جبکہ ٹیم نہ صرف ایونٹ سے آؤٹ ہوئی بلکہ گروپ میں خراب رن اوسط کے باعث گروپ میں آخری نمبر پر بھی رہی بہتر رن اوسط کے باعث بنگلادیش کی پوزیشن تیسری رہی۔
پاکستان اور بنگلہ دیش کے درمیان چیمپئنز ٹرافی میں جمعرات کو ہونے والا میچ وقفے وقفے سے بارش کی وجہ سے منسوخ کر دیا گیا ہے۔
میچ ریفری نے گراؤنڈ کا معائنہ کیا اور بارش کے باعث میچ منسوخ کرنے کا فیصلہ کیا۔ دونوں ٹیموں کو ایک ایک پوائنٹ دیا گیا۔ دونوں ٹیمیں پہلے ہی چیمپئنز ٹرافی سے باہر ہو چکی تھیں اور یہ ان کا آخری گروپ میچ تھا۔
بارش کی وجہ سے میچ کا ٹاس نہیں ہوا اور ایک گیند بھی کرائے بغیر ہی میچ منسوخ کر دیا گیا۔ بنگلہ دیش تین میچوں میں دو شکست اور ایک میچ رد ہونے کے ساتھ ایک پوائنٹ اور مائنس 0.44 نیٹ رن ریٹ کے ساتھ تیسرے نمبر پر رہی۔ دریں اثنا، میزبان پاکستان کی ٹیم مائنس 1.09 کے نیٹ رن ریٹ کے ساتھ گروپ پوائنٹس ٹیبل میں چوتھے نمبر پر رہی۔