گر سومناتھ میں مسمار کی گئی متنازعہ درگاہ پر ‘عرس’ میلے کی اجازت نہیں: سپریم کورٹ

نئی دہلی// سپریم کورٹ نے گجرات کے گر سومناتھ ضلع میں مسمار شدہ متنازعہ درگاہ پر 1 سے 3 فروری تک عرس میلہ منعقد کرنے کی اجازت دینے کی درخواست کوجمعہ کے روز مسترد کر دیا۔
جسٹس بی آر گوائی اور جسٹس آگسٹین جارج مسیح کی بنچ نے درخواست (اجازت کے لیے ) پر غور کرنے سے انکار کرتے ہوئے کہا کہ مرکزی کیس کی سماعت کیے بغیر اسے (‘عرس’ تہوار) منعقد کرنے کی اجازت نہیں دی جا سکتی۔
سالیسٹر جنرل تشار مہتا نے گجرات کے متعلقہ حکام کی طرف سے پیش ہوتے ہوئے کہا کہ ہندو مذہبی رسومات سمیت کسی بھی سرگرمی کی اجازت اس زمین پر نہیں دی جا رہی ہے جس پر پہلے قبضہ کیا گیا تھا۔
تاہم، درخواست گزار کے وکیل نے دلائل دیتے ہوئے عدالت کو بتایا کہ حکومتی نوٹیفکیشن ہے کہ یہ ایک محفوظ یادگار ہے ۔
مسٹر مہتا نے محکمہ آثار قدیمہ کے جواب کا حوالہ دیتے ہوئے دلیل دی کہ محکمہ نے کہا تھا کہ 2023 میں اس انہدام (تجاوزات) سے پہلے انہوں نے ایک سروے کیا تھا اور محکمہ کو آثار قدیمہ کی کوئی یادگار نہیں ملی تھی۔ اس سلسلے میں ایک سال قبل تفصیلی کارروائی کی گئی تھی۔
درخواست گزار کے وکیل نے کہا کہ وہاں ایک درگاہ تھی جسے حکام نے گرا دیا ہے ۔ انہوں نے کہا کہ درگاہ پر عرس میلہ منعقد کرنے کی روایت کئی سالوں سے چلی آ رہی ہے ۔
وکیل نے کہا کہ حکام نے جمعرات کو اس کی اجازت دینے سے انکار کر دیا تھا۔ عدالت سے استدعا کی گئی کہ کم از کم 20 افراد کے جمع ہونے کی اجازت دی جائے ۔
اس پر بنچ نے مسٹر مہتا سے کہا، ‘‘آپ کو کسی بھی مذہبی تقریب کی اجازت نہیں دینی چاہیے ، یہاں تک کہ ہندوؤں کو بھی نہیں’’۔
مسٹر مہتا نے جواب دیا کہ سومناتھ ٹرسٹ کو بھی حکام سے اجازت نہیں ملی ہے ۔
اس کے بعد بنچ نے درخواست گزار کے وکیل سے پوچھا کہ آپ توہین عدالت کی درخواست میں یہ ریلیف کیسے مانگ رہے ہیں؟
مسٹر مہتا نے بنچ کو بتایا کہ ‘‘سال 1951 میں یہ زمین سردار پٹیل نے سومناتھ ٹرسٹ کو الاٹ کی تھی اور کچھ راہگیر توہین عدالت کی درخواست دائر کر رہے ہیں۔ وہ (عدالت عظمیٰ میں زیر التوا کیس میں) مرکزی درخواست گزار نہیں ہے ۔
مسمار کرنے کے عمل اور گرائے گئے ڈھانچے کے بارے میں، انہوں نے عدالت کو بتایا، "تمام مذاہب کے غیر مجاز ڈھانچے کو گرا دیا گیا۔ پہلے مرحلے میں 8 اکتوبر 2023 کو 26 تجاوزات ہٹائی گئیں جن میں سے ایک کا تعلق ہندو برادری سے تھا۔ انہوں نے کہا کہ دوسرے مرحلے میں 27 جنوری 2024 کو ہندو برادری کے لوگوں کے مندروں سمیت 174 تجاوزات ہٹائے گئے ۔
انہوں نے یہ بھی بتایا کہ تیسرے مرحلے میں 27 اور 28 جنوری 2024 کو ایک گاؤں سے عوامی سڑکوں پر 155 تجاوزات ہٹائی گئیں جن میں سے 147 کا تعلق ہندو برادری سے اور 8 کا تعلق مسلم برادری سے تھا۔
انہوں نے کہا کہ چوتھے مرحلے میں ہندو برادری سے تعلق رکھنے والے افراد کی 40 تجاوزات ہٹائی گئیں اور پانچویں مرحلے میں 102 ایکڑ سرکاری اراضی کو تجاوزات سے آزاد کرایا گیا۔
مسٹر مہتا نے کہا کہ توہین عدالت کا مقدمہ عدالت کے اس حکم کے پس منظر میں دائر کیا گیا تھا، جس میں کہا گیا تھا کہ کارروائی کے بغیر توڑ پھوڑ نہیں کی جانی چاہئے ، لیکن عدالت نے یہ واضح کر دیا تھا کہ عوامی مقام یا سرکاری اراضی پر کسی بھی تجاوزات کو نہیں بچایا جاسکتا۔
انہوں نے کہا کہ بلاشبہ یہ سرکاری زمین ہے ۔
مسٹر مہتا نے عدالت کو بتایا کہ انہوں نے نچلی عدالت اور ہائی کورٹ میں توہین کی درخواست دائر کی تھی، جسے خارج کر دیا گیا۔
عدالت نے 27 جنوری کو کہا تھا کہ وہ تین ہفتوں کے بعد ان درخواستوں کی سماعت کرے گی، جس میں عدالت کی پیشگی اجازت کے بغیر گر سومناتھ ضلع میں مبینہ طورپر رہائشی اور مذہبی ڈھانچوں کو مسمار کرنے کے الزام ہیں۔ اس میں گجرات کے افسران کے خلاف توہین عدالت کی درخواست بھی شامل ہے ۔