آسٹریلیا کی خواتین ٹیم نے انگلینڈ کو وائٹ واش کیا

ایڈیلیڈ// بیتھ مونی (ناٹ آؤٹ 94) کی نصف سنچری اننگز اور جارجیا ویرہم (تین وکٹ) کی شاندار کارکردگی کی بدولت ہفتہ کے روز آسٹریلیا کی خواتین ٹیم نے تیسرے ٹی-20 میچ میں انگلینڈ کو 72 رنز سے شکست دے دی۔ اس کے ساتھ ہی آسٹریلیا نے تین میچوں کی ٹی ٹوئنٹی سیریز 3-0 سے جیت لی ہے۔
آسٹریلیا کے 165 رنز کے جواب میں بیٹنگ کے لیے آنے والی انگلینڈ کی شروعات خراب رہی اور اس نے 48 کے اسکور تک سات وکٹیں گنوا دیں۔ صوفیہ ڈنکلے (پانچ)، ایلس کیپسی (چھ)، نیٹ سائور برنٹ (ایک)، ڈینیئل وائٹ (17)، ایمی جونز (صفر)، فرییا کیمپ (پانچ) اور شارلٹ ڈین (ایک) رنز بنانے کے بعد آؤٹ ہوئیں۔ تاہم اس دوران کپتان ہیدر نائٹ ایک سرے کو تھامے کھڑی تھیں۔ سوفی ایکلسٹن (پانچ) اور لنسی اسمتھ (ایک) رنز بنانے کے بعد آؤٹ ہوئیں۔ انگلینڈ کی آخری وکٹ ہیتھر نائٹ (40) کی صورت میں گری۔ آسٹریلیا کے بالنگ اٹیک کے سامنے انگلینڈ کی پوری ٹیم 17.3 اوورز میں 90 رنز پر ڈھیر ہوگئی۔
آسٹریلیا کی جانب سے جارجیا ویرہم نے تین اور ڈارسی براؤن نے دو وکٹیں حاصل کیں۔ میگن شٹ، الانا کنگ، انابیل سدرلینڈ اور تالیا میک گرا نے ایک ایک بلے باز کو آؤٹ کیا۔
اس سے قبل آج آسٹریلیا کی خواتین ٹیم نے ٹاس جیت کر پہلے بیٹنگ کرتے ہوئے 20 اوورز میں پانچ وکٹوں پر 165 رنز بنائے۔ بیتھ مونی اور جارجیا وال کی اوپننگ جوڑی نے اچھا آغاز کیا اور پہلی وکٹ کے لیے 56 رنز جوڑے۔ جارجیا وال (23) آٹھویں اوور میں 23 رنز بنانے کے بعد آؤٹ ہو گئیں۔ اس کے بعد فوبی لیچ فیلڈ (12)، ایلس پیری (12)، گریس ہیرس (11) اور انابیل سدرلینڈ (تین) رنز بنانے کے بعد آؤٹ ہوئیں۔ انگلینڈ کی جانب سے بیتھ مونی نے 63 گیندوں میں 10 چوکے لگا کر 94 رنز (ناٹ آؤٹ) بنائے، لینسی اسمتھ، فرییا کیمپ، شارلٹ ڈین، سوفی ایکلسٹن اور ایلس کیپسی نے ایک ایک بلے باز کو آؤٹ کیا۔