کشمیر روٹ کیلئے خصوصی طور پر ڈیزائن کردہ وندے بھارت ٹرین کی رونمائی

نئی دہلی//
ریلوے بورڈ نے وندے بھارت ایکسپریس ٹرین کی رونمائی کی ہے، جسے خاص طور پر جموں و کشمیر کے موسم سرما کے چیلنجنگ حالات میں بغیر کسی رکاوٹ کے چلانے کے لیے تیار کیا گیا ہے۔
عہدیداروں نے بتایا کہ فی الحال ریلوے سیفٹی کمشنر کے ذریعہ اس روٹ کا معائنہ کیا جارہا ہے۔
ریلوے کے مطابق نئی دہلی کے شکور بستی کوچنگ ڈپو میں تعینات اس ٹرین میں آب و ہوا سے متعلق خصوصی خصوصیات ہیں۔
میڈیا کے نمائندوں کو اس کی خصوصیات بیان کرتے ہوئے ریلوے عہدیداروں نے کہا کہ اس ٹرین میں اس وقت ملک کے مختلف حصوں میں چل رہی دیگر۱۳۶ وندے بھارت ایکسپریس ٹرینوں کے مقابلے میں کئی اضافی خصوصیات ہیں تاکہ یہ جموں و کشمیر کے شدید موسمی حالات میں آپریشنل چیلنجوں اور مسافروں کی سہولیات کا مقابلہ کرسکے۔
ریلوے بورڈ کے ایگزیکٹیو ڈائریکٹر (انفارمیشن اینڈ پبلسٹی) دلیپ کمار نے کہا’’اس میں ایڈوانس ہیٹنگ سسٹم ہے جو واٹر ٹینک اور بائیو ٹوائلٹ ٹینکوں کو منجمد ہونے سے روکتا ہے، ویکیوم سسٹم کے ساتھ ساتھ لیبارٹریوں کے لئے گرم ہوا فراہم کرتا ہے اور یہ یقینی بناتا ہے کہ ایئر بریک سسٹم صفر سے نیچے کے درجہ حرارت میں بھی ہموار آپریشن کے لئے بہتر طریقے سے کام کرے‘‘۔
کمار کا مزید کہنا تھا’’اس میں ونڈ شیڈ میں ہیٹنگ عناصر شامل کیے گئے ہیں تاکہ ڈرائیور کے فرنٹ لک آؤٹ گلاس کو خود بخود ڈیفرسٹ کیا جا سکے اور سخت سردیوں میں واضح نظارہ کو یقینی بنایا جا سکے‘‘۔
بورڈ کے عہدیداروں نے بتایا کہ آب و ہوا سے متعلق خصوصیات کے علاوہ ، اس میں دیگر تمام سہولیات موجود ہیں جو موجودہ وندے بھارت ٹرینوں میں ہیں… مکمل طور پر ایئر کنڈیشنڈ کوچ ، خودکار پلگ دروازے ، موبائل چارجنگ ساکٹ وغیرہ۔
ریلوے کے ایک پریس بیان میں کہا گیا ہے کہ وادی کشمیر کو قومی ریلوے نیٹ ورک سے زیادہ مؤثر طریقے سے جوڑ کر یہ ٹرین جغرافیائی اور اقتصادی خلا کو پر کرنے کیلئے ہندوستان کے عزم کی علامت ہے۔ (ایجنسیاں)