صدر جمہوریہ جمعرات کو وزیر اعظم کا بچوں کا قومی ایوارڈ پیش کریں گے

نئی دہلی//) صدر جمہوریہ دروپدی مرمو جمعرات کو 14 ریاستوں اور مرکز کے زیر انتظام علاقوں کے 17 بچوں کو سات زمروں میں غیر معمولی کامیابیوں کے لیے ‘وزیر اعظم کا بچوں کا قومی ایوارڈ’ پیش کریں گی۔
خواتین و اطفال کی بہبود کی مرکزی وزارت نے آج یہاں کہا کہ وزیر اعظم کا بچوں کا قومی ایوارڈ بچوں کو سات زمروں میں غیر معمولی کامیابیوں کے لیے دیا جاتا ہے ۔ یہ ایوارڈز فن و ثقافت، بہادری، اختراع، سائنس اور ٹیکنالوجی، سماجی خدمت، کھیل اور ماحولیات کے شعبوں میں دیے جاتے ہیں۔ اس سال 14 ریاستوں اور مرکز کے زیر انتظام علاقوں سے 17 بچوں کا انتخاب کیا گیا ہے ، جن میں سے 7 لڑکے اور 10 لڑکیاں ہیں۔ محترمہ مرمو 26 دسمبر کو ان بچوں کو ایوارڈ دیں گی۔ ہر ایوارڈ یافتہ کو ایک میڈل، سرٹیفکیٹ اور حوالہ جات کا کتابچہ دیا جائے گا۔
وزارت کے مطابق اسی دن ویر بال دیوس کا قومی پروگرام بھارت منڈپم میں منعقد کیا جائے گا۔ اس پروگرام میں وزیر اعظم نریندر مودی بھی شرکت کریں گے ۔ پروگرام میں وہ سوپوشوتھا پنچایت اسکیم کا افتتاح کریں گے اور مارچ پاسٹ کو جھنڈی دکھائیں گے ۔ مرکزی وزیر برائے بہبود خواتین و اطفال اناپورنا دیوی افتتاحی خطاب کریں گی۔ تقریب میں ایوارڈ یافتہ بچوں اور معززین کے ساتھ تقریباً 3500 بچے شرکت کریں گے ۔
اس تقریب میں ہندوستان کی وراثت کی نمائش کرنے والی ثقافتی پرفارمنس اور متنوع ثقافتوں کی نمائندگی کرنے والے بچوں کا مارچ پاسٹ شامل ہوگا۔ مزید برآں، ملک بھر کے اسکولوں، بچوں کی دیکھ بھال کرنے والے اداروں، آنگن واڑی مراکز میں آن لائن سرگرمیوں سمیت کہانی سنانے ، تخلیقی تحریر، پوسٹر سازی، مضمون لکھنے ، شاعری اور کوئز جیسی سرگرمیاں ہوں گی۔