اگزام فارم پر جی ایس ٹی لگا کر حکومت نوجوانوں کے خواب چھین رہی ہے : پرینکا

نئی دہلی// کانگریس جنرل سکریٹری پرینکا گاندھی وڈرا نے نوکری حاصل کرنے کے لیے فارم بھرنے کے بجائے بے روزگار بچوں سے جی ایس ٹی وصول کرنے کے سرکاری اقدام کو غیر منصفانہ قرار دیتے ہوئے کہا کہ یہ صرف بے روزگاروں کے زخموں پر نمک چھڑکنے کے مترادف ہے ۔
انہوں نے کہا کہ بے روزگار نوجوان نوکری حاصل کرنے کے لیے امتحانی فارم بھرتے ہیں لیکن مودی حکومت ان بچوں سے جی ایس ٹی وصول کر رہی ہے ۔ اگنی ویر میں بھرتی کے لیے درخواست فارم پر بھی جی ایس ٹی لگایا جا رہا ہے اور یہ ایسی صورتحال ہے جو بے روزگار نوجوانوں کے زخموں پر نمک چھڑک رہی ہے ۔
محترمہ وڈرا نے کہاکہ ”بی جے پی نوجوانوں کو نوکریاں نہیں دے سکتی لیکن امتحانی فارم پر 18 فیصد جی ایس ٹی لگا کر نوجوانوں کے زخموں پر نمک چھڑک رہی ہے ۔ اگنی ویر سمیت ہر سرکاری ملازمت کے فارم پر جی ایس ٹی جمع کیا جا رہا ہے ۔ فارم بھرنے کے بعد حکومت کی ناکامی کی وجہ سے پیپر لیک ہو جاتا ہے اور اگر کرپشن ہوتی ہے تو نوجوانوں کا پیسہ ضائع ہو جاتا ہے ۔
انہوں نے کہاکہ ‘‘والدین اپنے بچوں کو پڑھانے اور انہیں تیار کرنے کے لیے سخت محنت کرتے ہیں، لیکن بی جے پی حکومت نے ان کے خوابوں کو بھی کمائی کا ذریعہ بنا دیا ہے ۔’’