کٹھوعہ میں بھیانک آتشزدگی۲بچوں سمیت ایک ہی کنبے کے۶ ہلاک‘ایل جی کا رنج و غم کا اظہار

جموں//
جموںکشمیر کے ضلع کٹھوعہ کے شیو نگر علاقے میں آتشزدگی کی ایک المناک واردات میں۲بچوں سمیت ایک ہی کنبے کے۶؍افراد دم گٹھنے سے لقمہ اجل بن گئے جبکہ ۴دیگر زخمی ہوئے ۔
پولیس ذرائع نے بتایا کہ کٹھوعہ کے شیو نگر علاقے میں ایک سبکدوش پولیس افسر۸۱سالہ اوتار کرشن کے مکان کے اندر آگ لگ گئی۔انہوں نے کہا کہ اس واردات میں مکان میں سوئے ہوئے۶؍افراد جن میں دو کمسن بچے شامل ہیں، کی دم گٹھنے سے موت واقع ہوئی جبکہ چار دیگر بے ہوش ہوگئے ۔
ذرائع نے کہا کہ گر چہ ان کو گورنمنٹ میڈیکل کالج اور ہستال کٹھوعہ پہنچایا گیا لیکن وہاں موجود ڈاکٹروں نے۶کو مردہ قرار دیا۔ہسپتال ذرائع نے بتایا کہ بظاہر دم گٹھنے سے یہ اموات واقع ہوئی ہیں۔
متوفین کی شناخت ۱۷سالہ گنگا بھگت دختر بھارت بھوشن ، اس کا بھائی۱۵سالہ اوتار کرشن‘۲۵سالہ برکھا رینہ دختر بھارت بھوشن‘۳سالہ تاکش رینہ اور ۴سالہ ادیک رینہ پسران سندیپ کول کے طور پر ہوئی ہے ۔
زخمیوں کی شناخت ۶۱سالہ سورنہ زوجہ اوتار کرشن‘۴۰سالہ نیتو دیوی زوجہ بھارت بھوش‘۱۵سالہ ارن کمار ولد ایس چند ساکن رام بن اور کیول کرشن ولد منسہ رام ساکن شیو نگر کٹھوعہ کے طور پر کی گئی ہے ۔
پولیس نے موقع پر پہنچ کر واردات کے متعلق تحقیقات شروع کی ہے۔
دریں اثنا مرکزی وزیر ڈاکٹر جتندر سنگھ نے اس واردات پر گہرے دکھ کا اظہار کرتے ہوئے متاثرین کے اہلخانہ کے ساتھ ہمدردی کا اظہار کیا۔
مرکزی وزیر نے’ایکس‘پر اپنے ایک پوسٹ میں کہا’’کٹھوعہ کے شیو نگر علاقے میں آگ لگنے کے نتیجے میں ایک ہی خاندان کے۶؍افراد کی حادثاتی موت کے بارے میں جان کر صدمہ ہوا‘‘۔انہوں نے سوگوار خاندان سے دلی تعزیت اور زخمیوں کی جلد صحت یابی کیلئے دعاگو ہوں۔
ان کا پوسٹ میں مزید کہنا تھا’’میں ضلعی انتظامیہ سے مسلسل رابطے میں ہوں منڈل صدر راہل جی کی قیادت میں بی جے پی کارکنوں کی ہماری ٹیم موقع پر مدد کر رہی ہے ۔‘‘
اس دوران جموں کشمیر کے لیفٹیننٹ گورنر منوج سنہا نے ضلع کٹھوعہ میں آتشزدگی کے ایک المناک واردات میں ہونے والے جانی نقصان پر دکھ کا اظہار کیا۔
سنہا نے ’ایکس‘پر اپنے ایک پوسٹ میں اس واردات پر صدمے کا اظہار کرتے ہوئے کہا’’کٹھوعہ میں خوفناک آتشزدگی کی وجہ سے ہونے والے جانی نقصان پر انتہائی دکھ ہوا ہے ‘‘۔
ایل جی نے کہا’’میرے خیالات سوگوار خاندانوں کے ساتھ ہیں اور میں زخمیوں کی جلد صحت یابی کی دعا کرتا ہوں۔‘‘