وزیر اعلیٰ بننے کے بعد پہلی بار پہنچنے پر عمر کا جموں سیکریٹریٹ میں پر تپاک استقبال

جموں//
جموں و کشمیر کے وزیر اعلیٰ عمر عبداللہ نے پیر کے روز یہاں سول سکریٹریٹ سے کام کرنا شروع کردیا۔
عہدیداروں نے بتایا کہ نائب وزیر اعلی ، کابینی وزراء ، چیف سکریٹری ، انتظامی سکریٹریوں اور محکموں کے سربراہوں نے بھی جموں سے اپنا کام دوبارہ شروع کردیا ہے۔
جنرل ایڈمنسٹریشن ڈپارٹمنٹ کی جانب سے ۲۳ اکتوبر کو جاری کیے گئے ایک حکم نامے کے مطابق صرف انتظامی سکریٹری اور محکمہ کے اعلیٰ سربراہان ہی سرینگر سے جموں منتقل ہوں گے۔
حکم نامے میں کہا گیا ہے کہ سرینگر میں سول سیکریٹریٹ بھی فعال رہے گا۔
جموں کشمیر میں ایک دیرینہ روایت یہ سالانہ اقدام ۲۰۲۰ میں کوویڈ۱۹ وبائی امراض کے دوران روک دیا گیا تھا۔ وادی میں سخت سردی کی وجہ سے اکتوبر سے مئی تک حکومت کو سرینگر سے جموں منتقل کرنا شامل تھا۔
مرکز کے زیر انتظام علاقے کے طور پر تشکیل پانے کے بعد عبداللہ جموں و کشمیر کے پہلے وزیر اعلی ٰ ہیں۔
اس سے قبل وہ ۲۰۰۹ سے۲۰۱۴ تک جموں و کشمیر کے وزیر اعلیٰ رہے تھے، جب یہ ایک مکمل ریاست تھی۔
وزیر اعلی عمر عبداللہ کا سرمائی دارالخلافہ میں عہدہ سنبھالنے کیلئے پہنچنے پر سول سیکرٹریٹ جموں میںوالہانہ اِستقبال کیا گیا۔یہ جموں سیکرٹریٹ کاوزیر اعلیٰ عمرعبداللہ کا۱۶؍اکتوبر کو سری نگرمیں جموں و کشمیر کے وزیر اعلی کا عہدہ سنبھالنے کے بعد پہلا سرکاری دورہ تھا۔
وزیر اعلی عمر عبداللہ کا ان کی کابینی وزرأ بشمول نائب وزیر اعلی سریندر کمار چودھری اور کابینہ ارکان سکینہ مسعود اِیتو ، جاوید احمد رانا ، جاوید احمد ڈار اور ستیش شرما نے گرمجوشی سے اِستقبال کیا۔
وزیراعلیٰ کے مشیر ناصر اسلم وانی، چیف سیکرٹری اَتل ڈولو ، وزیر اعلیٰ کے ایڈیشنل چیف سیکرٹری دھیرج گپتا اور دیگر سینئر اَفسران اور سول سیکرٹریٹ کا عملہ بھی اُن کے اِستقبال کیلئے موجود تھا۔
وزیراعلیٰ نے اَپنے وزراء کے چیمبروں کادورہ کر کے اُن کا باضابطہ اِستقبال کیا جو باہمی تعاون سے کام کرنے کے ماحول کو فروغ دینے کے عزم کی عکاسی کرتا ہے۔
بعد ازاںعمر عبداللہ نے جموں میں زیر تعمیر قانون ساز اسمبلی کمپلیکس کا دورہ کیا۔ اس موقع پر انہوں نے عمارت کی تعمیراتی پیشرفت کا جائزہ لیا اور مختلف پہلوؤں پر متعلقہ افسران سے تبادلہ خیال کیا۔
عمرعبداللہ نے سائٹ پر موجود انجینئرز اور افسران سے تعمیر کی رفتار، معیار اور حفاظت کے حوالے سے تفصیلی معلومات لیں اور اس بات پر زور دیا کہ اسمبلی عمارت کی بروقت تکمیل ریاست کی انتظامی کارکردگی کو بہتر بنانے کے لئے ناگزیر ہے۔
وزیر اعلیٰ نے متعلقہ افسران کو منصوبے کی بروقت تکمیل اور معیار کی پاسداری یقینی بنانے کی ہدایت کی۔ انہوں نے کہا کہ اس عمارت کی تعمیر ریاستی ترقی کے لیے ایک اہم قدم ہے۔