سرینگر28/اکتوبر
جموں کشمیر کے اکھنور علاقے میں تین عسکریت پسندوں کو مار گرایا گیا ہے۔
اس سے قبل آج علاقے میں عسکریت پسندوں کی جانب سے فوج کی ایک گاڑی اور ایک ایمبولینس پر فائرنگ کی گئی جس کے بعد فوج کا کہنا تھا کہ علاقے میں فائرنگ کا تبادلہ شروع ہو گیا ہے۔
سرکاری ذرائع کے حوالے سے ایک مقامی خبر رساں ادارے این وی آئی نے خبر دی ہے کہ تین عسکریت پسند مارے گئے ہیں جبکہ ان کی لاشیں برآمد کر لی گئی ہیں۔انہوں نے بتایا کہ علاقے میں سرچ آپریشن جاری ہے۔
سرکاری ذرائع نے بتایا کہ اکھنور کے سندر بنی سیکٹر میں بٹل کری جوگون علاقے میں لائن آف کنٹرول (ایل او سی) کے نزدیک پیر کی صبح ملی ٹنٹوں نے ایک فوجی ایمبولینس پر فائرنگ کی جس کے بعد سیکورٹی فورسز نے علاقے کو محاصرے میں لے کر تلاشی آپریشن شروع کر دیا ہے ۔
پولیس نے بتایا” اکھنور کے سندربنی سیکٹر کے کھوور علاقے میں آسن مندر میں بٹل کے قریب تین دہشت گردوں کو دیکھا گیا ہے “۔
انہوں نے کہا کہ دہشت گردوں نے آرمی ایمبولینس پر کچھ را¶نڈ فائرنگ کئے جس کے بعد علاقے کو گھیرے میں لے لیا گیا اور پولیس اور سیکورٹی فورسز نے مشترکہ سرچ آپریشن شروع کیا۔
ان کا کہنا تھا”دہشت گردوں نے تلاشی ٹیم پر فائرنگ کی جس پر جوابی کارروائی کی گئی اور فائرنگ شروع ہو گئی“۔
انہوں نے مزید کہا کہ فائرنگ میں اپنی طرف سے کسی کے زخمی ہونے کی اطلاع نہیں ہے جبکہ محاصرہ کیا گیا ہے اور آپریشن جاری ہے ۔
دریں اثنا فوج کی وائٹ نائٹ کور نے’ایکس‘پر اپنے ایک پوسٹ میں کہا”سندر بنی سیکٹر کے اسن علاقے کے نزدیک آج صبح دہشت گردوں نے فوجی گاڑیوں پر فائرنگ کی“۔
انہوں نے کہا”جوانوں کی فوری جوابی کارروائی اس کوشش کو ناکام بنا کر کوئی جانی نقصان نہ ہونے کو یقینی بنایا“۔
ان کا کہنا ہے کہ علاقے میں تلاشی آپریشن جاری ہے ۔
