حج۲۰۲۲: روزانہ ۲ سے ۳ پروازوں میں ۶ ہزار عازمین روانہ ہوں گے :پولے

سری نگر//
صوبائی کمشنر کشمیر پی کے پولے کا کہنا ہے کہ امسال جموں کشمیر سے تعلق رکھنے والے قریب چھ ہزار عازمین فریضہ حج انجام دیں گے ۔
پولے نے کہا کہ جموں و کشمیر سے پہلی پرواز پانچ جون سے عازمین کے قافلہ لے کر روانہ ہوگی اور یہ سلسلہ پندرہ دنوں تک جاری رہے گا۔
صوبائی کمشنر نے ان باتوں کا اظہار جمعرات کو یہاں حج ہاؤس میں انتظامات کا جائزہ لینے کے دوران نامہ نگاروں کے ساتھ بات کرتے ہوئے کیا۔
پولے نے کہا’’اس سال جموں و کشمیر سے چھ ہزار کے قریب عازمین حج کا فریضہ انجام دیں گے ‘‘۔ان کا کہنا تھا کہ ان میں سے پانچ ہزار چار سو کا تعلق کشمیر سے ہے جبکہ باقی صوبہ جموں اور لداخ یونین ٹریٹری کے ہیں‘‘۔
صوبائی کمشنرنے کہا کہ ہر دن دو یا تین پروازیں عازمین کے قافلوں کو لے کر روانہ ہوں گی اور یہ سلسلہ پندرہ دنوں تک جاری رہے گا۔انہوں نے کہا کہ حج ہاؤس میں تمام تر انتظامات کو عملی شکل دی گئی ہے تاکہ عازمین کو کسی قسم کی دقت کا سامنا نہ کرنا پڑے ۔
پولے کا کہنا تھا کہ عازمین کو پرواز کے مقررہ وقت سے چار ساڈھے چار گھنٹے قبل ہی پہنچنا ہے اور انہیں آر ٹی پی سی ٹیسٹ بھی کرانا ہے جس کیلئے جے وی سی ہسپتال میں سہولیات دستیاب رکھی گئی ہیں۔
قابل ذکر ہے کہ امسال کورونا وبا کی وجہ سے دو برس بعد غیر ملکی عازمین یہ فریضہ انجام دیں گے ۔
سعودی حکومت کی طرف سے جاری حج کوٹے کے مطابق امسال دنیا بھر سے دس لاکھ عازمین اس فریضے کو انجام دیں گے جبکہ بھارت سے۵۵ہزار ایک سو ۶۴ خواہشمند افراد حج کریں گے ۔تاہم سعودی حکومت نے امسال۶۵برس سے کم عمر کے افراد کو ہی حج انجام دینے کی اجازت دی ہے ۔