کانگریس جموں و کشمیر کو ریاست کا درجہ واپس دلانے کو یقینی بنائے گی: کھرگے

نئی دہلی/17 ستمبر
کانگریس کے صدر ملکارجن کھرگے نے منگل کو کہا کہ ان کی پارٹی جموں و کشمیر کے حقوق کی ضمانت دیتی ہے اور اس بات کو یقینی بنائے گی کہ اسے ایک مکمل ریاست کا درجہ واپس ملے۔
اسمبلی انتخابات سے قبل کانگریس کی جانب سے وعدہ کی گئی سات گارنٹیوں کے اسکرین شاٹس کو ٹیگ کرتے ہوئے کھرگے نے ایکس پر ایک پوسٹ میں کہا کہ پارٹی ایک لاکھ سرکاری نوکریوں کو بھر کر نوجوانوں کو نئی توانائی دے گی۔
کانگریس جموں و کشمیر کے حقوق کی ضمانت دیتی ہے۔ ہم جموں و کشمیر کو ایک مکمل ریاست کا درجہ دلائیں گے۔
کھرگے نے ہر خاندان کے لئے 25 لاکھ روپے کے مفت علاج اور ہر ضلع میں ایک سپر اسپیشلٹی اسپتال کے پارٹی کے وعدے پر بھی روشنی ڈالی۔ انہوں نے کہا کہ اس سے ایک صحت مند معاشرہ تشکیل پائے گا۔
کانگریسی صدر نے کہا کہ ڈاکٹر منموہن سنگھ کے کشمیری پنڈتوں کی بازآبادکاری کے منصوبے کو وسعت دی جائے گی۔ او بی سی طبقے کے آئین پر مبنی حقوق کا تحفظ کیا جائے گا۔انہوں نے کہا کہ خاندانوں کی خواتین سربراہوں کو ہر ماہ 3000 روپے کا مالی تحفظ ملے گا۔ کھرگے نے 11 کلو گرام اناج کے ساتھ فیملی کے ہر رکن کے لئے غذائی تحفظ کے وعدے پر بھی روشنی ڈالی۔
جموں و کشمیر میں اسمبلی انتخابات کے لئے پیر کو جاری اپنے منشور میں کانگریس نے کسانوں ، خواتین اور نوجوانوں کے لئے متعدد فلاحی اقدامات کا وعدہ کیا ہے۔
منشور کی خاص بات یہ ہے کہ قدرتی آفات کے خلاف تمام فصلوں کے لئے بیمہ اور سیب کی کم از کم امدادی قیمت (ایم ایس پی) 72 روپے فی کلو گرام ہے۔
منشور اے آئی سی سی میڈیا اینڈ پبلسٹی ڈپارٹمنٹ کے سربراہ پون کھیرا اور پی سی سی صدر طارق حمید قرہ نے سرینگر میں پارٹی دفتر میں جاری کیا۔
کھرگے نے کہا”ہم بے زمین، کرایہ دار اور زمین کے مالک کسان گھرانوں کو ہر سال ۴۰۰۰ روپے کی اضافی مالی مدد فراہم کریں گے۔ ہم سرکاری زمین پر کھیتی کرنے والے بے زمین کسانوں کو 99 سال کی لیز کا بھی انتظام کریں گے“۔
کانگریسی صدر نے کہا کہ جموں و کشمیر میں کسانوں کے لئے 100 فیصد آبپاشی کو یقینی بنانے کے لئے تمام ضلع سطح کے آبپاشی پروجیکٹوں کے لئے 2500 کروڑ روپے کا فنڈ قائم کیا جائے گا۔
جموں و کشمیر کے نوجوانوں کے لئے پارٹی نے اہل نوجوانوں کو ایک سال کے لئے 3500 روپے ماہانہ تک بے روزگاری الاو¿نس دینے کا وعدہ کیا ہے۔
پارٹی نے30 دن کے اندر جاب کیلنڈر جاری کرکے ایک لاکھ خالی سرکاری عہدوں کو پر کرنے کا وعدہ کیا ہے۔
منشور میں کہا گیا ہے کہ پارٹی پولیس، فائر بریگیڈ اور فاریسٹ پروٹیکشن فورس کے لئے خصوصی سرحدی بھرتیوں کو بحال کرے گی۔ اس میں بے روزگار انجینئروں کے گروپوں کو تعمیراتی کام سے متعلق ۳۰ فیصد ٹھیکے الاٹ کرنے کی اسکیم کو بحال کرنے کا بھی وعدہ کیا گیا ہے۔
منشور میں کہا گیا ہے کہ ہم تمام سرکاری ملازمتوں، پاسپورٹس اور دیگر مقاصد کے لئے تصدیق کے عمل کو آسان بنائیں گے اور انہیں مقررہ وقت اور آسان بنائیں گے تاکہ غیر ضروری ہراسانی کو روکا جاسکے۔
کھیرا نے کہا کہ کانگریس زخموں پر مرہم رکھے گی”لمبی رات ختم ہو گئی ہے اور ہم پر ایک نئی صبح طلوع ہوئی ہے۔ ہاتھ بدلے گی جموں و کشمیر کی سلامتی۔“ (ایجنسیاں)