سی پی آئی (ایم) کے لیڈر سیتارام یچوری نہیں رہے

نئی دہلی//ہندوستانی مارکسی کمیونسٹ پارٹی (سی پی آئی ایم) کے جنرل سکریٹری سیتارام یچوری کا طویل علالت کے بعد جمعرات کو نئی دہلی کے آل انڈیا انسٹی ٹیوٹ آف میڈیکل سائنسز (ایمس) میں انتقال ہوگیا۔ ان کی عمر 72 برس تھی۔
مسٹر یچوری کو پھیپھڑوں میں انفیکشن کی شکایت پر 19 اگست کو ایمس میں داخل کرایا گیا تھا۔ انہیں انتہائی نگہداشت یونٹ ( آئی سی یو ) میں داخل کرایا گیا تھا۔ طبیعت بگڑنے کے بعد انہیں وینٹی لیٹر پر رکھا گیا جہاں انہوں نے آج آخری سانس لی۔
مسٹر یچوری کو 2015 میں پارٹی کا جنرل سکریٹری منتخب کیا گیا تھا۔ وہ راجیہ سبھا کے رکن رہ چکے ہیں۔ انہیں 2016 میں بہترین پارلیمنٹیرین کا ایوارڈ دیا گیا تھا۔
کانگریس کے سابق صدر اور لوک سبھا میں اپوزیشن لیڈر راہل گاندھی نے مارکسی کمیونسٹ پارٹی (سی پی آئی-ایم) کے لیڈر سیتارام یچوری کے انتقال پر گہرے غم کا اظہار کرتے ہوئے انہیں اپنا بہترین دوست قرار دیا۔
مسٹر گاندھی نے کہا "سیتارام یچوری جی ایک اچھے دوست تھے ۔ ہندوستان کے نظریات کے ایک محافظ تھے جو ہمارے ملک کے بارے میں گہری سمجھ رکھتے تھے ۔ میں ہمارے اور ان کے درمیان طویل بات چیت سے محروم رہوں گا۔ غم کی اس گھڑی میں ان کے لواحقین، دوستوں اور پیروکاروں کے ساتھ دل کی گہرائی سے اظہار ” ہمدردی۔”
کانگریس نے اپنے آفیشل پیج پر ٹویٹ کرکے خراج عقیدت پیش کرتے ہوئے کہا "سی پی آئی (ایم) کے جنرل سکریٹری اور سینئر لیڈر سیتارام یچوری کا انتقال ہندوستانی سیاست کے لیے ایک ناقابل تلافی نقصان ہے ۔ خدا ان کی روح کو شانتی دے اور سوگوار خاندان کے افراد کو صبر جمیل عطا فرمائے اور اس دکھ کو برداشت کرنے کی طاقت دے ۔
ادھر لوک سبھا کے اسپیکر اوم برلا نے ہندوستانی مارکسی کمیونسٹ پارٹی کے جنرل سکریٹری سیتارام یچوری کے انتقال پر تعزیت کا اظہار کیا ہے ۔
مسٹر برلا نے اپنے تعزیتی پیغام میں کہا ‘‘میں سینئر سیاست دان اور سابق رکن پارلیمنٹ مسٹر سیتارام یچوری کے انتقال پر تعزیت کا اظہار کرتا ہوں۔ اللہ ان کی کی روح کو سکون عطا فرمائے اور لواحقین کو یہ صدمہ برداشت کرنے کی ہمت عطا فرمائے ۔ اوم شانتی۔”
قابل ذکر ہے کہ مسٹر یچوری کا آج یہاں ایمس میں 72 سال کی عمر میں انتقال ہوگیا۔ انہیں 19 اگست کو دہلی کے ایمس میں داخل کرایا گیا تھا۔