حرام سے حلال: جماعت اسلامی کے سابق ارکان بھی انتخابی میدان میں کود پڑے

سرینگر//
کالعدم جماعت اسلامی جموں و کشمیر کے چار سابق ارکان نے آزاد امیدواروں کے طور پر مرکز کے زیر انتظام علاقے میں اسمبلی انتخابات لڑنے کیلئے منگل کو کاغذات نامزدگی داخل کیے۔
مرکزی وزارت داخلہ کی جانب سے اس پر لگائی گئی پابندی کی وجہ سے جماعت اسلامی انتخابات میں حصہ نہیں لے سکتی، لیکن اس نے پابندی ہٹائے جانے کی صورت میں لوک سبھا انتخابات کے دوران انتخابات میں حصہ لینے میں دلچسپی ظاہر کی تھی۔
جماعت اسلامی نے۱۹۸۷کے بعد کسی بھی انتخابات میں حصہ نہیں لیا اور ۱۹۹۳سے ۲۰۰۳ تک علیحدگی پسند اتحاد حریت کانفرنس کا حصہ رہی ہے جس نے انتخابی بائیکاٹ کی وکالت کی تھی۔
جماعت اسلامی کے سابق امیر طلعت مجید نے پلوامہ حلقہ سے آزاد امیدوار کے طور پر کاغذات نامزدگی جمع کرائے۔
مجید نے کہا کہ۲۰۰۸ کے بعد سے بدلتے ہوئے جغرافیائی سیاسی منظر نامے پر غور کرنے کے بعد، انہوں نے ماضی کی کچھ ’سختیوں‘ کو چھوڑنے کی ضرورت محسوس کی۔
انہوں نے کہا کہ موجودہ جغرافیائی و سیاسی منظر نامے کے پیش نظر میں نے محسوس کیا کہ وقت آگیا ہے کہ ہم سیاسی عمل میں حصہ لیں۔ ’’میں ۲۰۱۴ سے بہت کھل کر اپنے خیالات کا اظہار کر رہا ہوں اور میں آج بھی اس ایجنڈے کو آگے بڑھا رہا ہوں‘‘۔
مجید نے کہا کہ موجودہ سیاسی منظر نامے میں جماعت اور حریت کانفرنس جیسی تنظیموں کا کردار ہے۔انہوں نے کہا ’’ جب ہم کشمیر کی صورتحال کے بارے میں بات کرتے ہیں تو ہم عالمی سطح پر صورتحال کو نظر انداز نہیں کرسکتے ہیں۔ کشمیری ہونے کے ناطے ہمیں حال میں رہنا چاہیے اور بہتر مستقبل کی طرف دیکھنا چاہیے‘‘۔
جماعت کے ایک اور سابق رہنما سیار احمد ریشی بھی کولگام اسمبلی سیٹ سے الیکشن لڑ رہے ہیں۔
ریشی نے لوگوں سے اپیل کی کہ وہ اپنے ضمیر کے مطابق ووٹ دیں۔ان کاکہنا تھا’’یہ اللہ پر منحصر ہے کہ وہ کسی شخص کو برکت دے یا اسے ذلیل کرے۔ لیکن میں لوگوں سے اپیل کروں گا کہ وہ اپنے ضمیر کے مطابق ووٹ دیں‘‘۔ انہوں نے مزید کہا ’’ہم اصلاحات کے لئے ایک تاریخی تحریک شروع کریں گے‘‘۔
ریشی نے اس بات کا اعتراف کرتے ہوئے کہ نوجوانوں کو کھیلوں سے متعارف کروا کر تشدد سے دور رکھا گیا ہے، کہا کہ نوجوانوں کو روزگار کی ضرورت ہے۔
ان کاکہنا تھا’’اس میں کوئی شک نہیں ہے کہ نوجوانوں کو بلے دیئے گئے ہیں لیکن اس سے ان کا پیٹ نہیں بھرے گا۔ بے روزگاری ہے اور قتل و غارت کا سلسلہ جاری ہے۔ عمر رسیدہ افراد کو صرف ہزار دو ہزار روپے تک کی معمولی بڑھاپے کی پنشن کے لیے ادھر ادھر بھاگنا پڑتا ہے۔ ہم سماجی انصاف کے لئے کام کریں گے‘‘۔
جموں و کشمیر میں ۲۰۱۹ میں آرٹیکل ۳۷۰ کی منسوخی کے بعد پہلی بار اسمبلی انتخابات ہو رہے ہیں۔ انتخابات جو۱۰ سال میں پہلی بار ہو رہے ہیں کے پہلے مرحلے کی پولنگ ۱۸ ستمبر، اس کے بعد ۲۵ستمبر اور یکم اکتوبر کو ہوگی۔ ووٹوں کی گنتی ۴؍ اکتوبر کو کی جائے گی۔