ہم نہیں جانتے ہیں اور بالکل بھی نہیں جانتے ہیں کہ جب لوگ … جموں کشمیر کے لوگ پولنگ مراکز کا رخ کریں گے تو…تو وہ کس کے حق میں اپنا ووٹ دیں گے ۔ ہم یہ نہیں جانتے ہیں ۔ یقینا لوگوں کیلئے اس بات کا فیصلہ کرنا اتنا بھی آسان نہیں ہو گا جتناہم سمجھتے ہیں … ایک طرف بی جے پی اور اس کی اے ‘بی ‘ سی ٹیمیں ہیں… دوسری جانب پی ڈی پی‘ این سی اور کانگریس ہے… یوں سمجھ لیجئے یہ ایک انار اور دو بیمار والا معاملہ ہے…یہاں انار یقینا ایک ہے ‘ لیکن بیمار صرف دو نہیں ہیں‘ کئی ایک ہیں…اس لئے صاحب ہم یہ نہیں جانتے ہیں کہ… کہ لوگ کس کے حق میں فیصلہ کریں گے… ہم یہ بھی نہیں جانتے ہیں کہ این سی اور کانگریس کا گٹھ جوڑ لوگوں کو اپنی اور کھینچنے میں کامیاب ہو جائیگا یا نہیں… اس میں کشش ضرور ہے… اور سو فیصد ہے‘ لیکن صاحب پھر بھی ہم نہیں جانتے ہیں… لیکن…لیکن ہاں اگر ہم کچھ جانتے ہیں تو…تو یہ ایک بات جانتے ہیں کہ یہ اتحاد … این سی اور کانگریس کا اتحاد ووٹ حاصل کرنے میںکامیاب ہو گا یا نہیں لیکن یہ بی جے پی کو پریشان کرنے میں ضرور کامیاب ہوا ہے… اور ہم یہ حلفاً کہتے ہیں ۔ بی جے پی اور اس کی قیادت بشمول وزیر داخلہ ‘ امیت بھائی شاہ کی طرف سے جوردعمل… شدید ردعمل آرہا ہے وہ اگر کسی بات کی چغلی کھا رہا ہے تو… تو اس ایک بات کی کہ… کہ بی جے پی یقینا اس تحاد سے ڈر گئی ہے… وہ خوفزدہ ہو گئی ہے… ورنہ اس اتحاد کے بارے میں بی جے پی جوکچھ بھی کہہ رہی ہے… نہیں کہتی ‘ بالکل بھی نہیں کہتی … اور اس لئے نہیں کہتی کیونکہ وہ جو کہہ رہی ہے اس کی کوئی منطق ‘ کوئی دلیل نہیںہے… اس لئے نہیں ہے کیونکہ بی جے پی کا کہنا ہے کہ یہ اتحاد…’ناپاک‘اتحاد اقتدار حاصل کرنے کیلئے کیا گیاہے…یقینا اس اتحاد کا مقصد حکومت… جموںکشمیر میں حکومت بنانا ہے… کیا بی جے پی جو اتحاد بنا تی ہے اس کا مقصد اپوزیشن میں بیٹھنا ہو تا ہے؟یقینا نہیں ہوتا ہے… الیکشن لڑے ہی اس لئے جاتے ہیں تاکہ جیت حاصل کرکے حکومت بنائی جائے … بی جے پی جموں کشمیر میں اسمبلی الیکشن اپوزیشن میں بیٹھنے کیلئے نہیں بلکہ حکومت بنانے کیلئے لڑ رہی ہے… اس نے بھی۲۰۱۴ میں پی ڈی پی سے حکومت بنانے کیلئے اتحاد کیا تھا… اتحاد سے پہلے مودی جی اور امیت بھائی شاہ پی ڈی پی کے بارے میں کہا کہتے ہیں وہ سب جانتے ہیں… لیکن پھر اقتدار کیلئے اسی سے اتحا د بھی کیا ۔ اگر این سی اور کانگریس نے بھی کیا تو… تو کیا برا کیا ؟ ہے نا؟
این سی کانگریس گٹھ جوڑ اور بی جے پی
