کراچی ٹیسٹ کا تیسرا دن ختم، آسٹریلیا کو 489 رنز کی برتری

کراچی //
کراچی ٹیسٹ کے تیسرے روز کا کھیل ختم ہوگیا، جہاں مہمان ٹیم نے دوسری اننگز میں 1 وکٹ گنوا کر 81 رنز بنالیے اور اسے پاکستان کے خلاف مجموعی طور پر 489 رنز کی برتری حاصل ہوگئی۔
شتیسرے روز پاکستان ٹیم آسٹریلیا کے پہلی اننگز کے 556 رنز کے سامنے صرف 148 رنز پر ڈھیر ہوگئی تھی اور کینگروز کو دوسری اننگز کی آغاز سے قبل ہی 408 رنز کی سبقت حاصل رہی۔
مہمان ٹیم کی جانب سے عثمان خواجہ 35 اور مارنس لبوشین 37 رنز کے ساتھ کریز پر موجود تھے جو چوتھے روز کھیل کا آغاز کریں گے۔
پاکستان کی جانب سے آسٹریلیا کی واحد وکٹ حسن علی نے لی جنہوں نے 7 رنز بنانے والے ڈیوڈ وارنر کو آؤٹ کیا۔
اس سے قبل پاکستان کی جانب سے پہلی اننگز کا آغاز کیا گیا تو اوپنر عبداللّٰہ شفیق 13 رنز بنا کر رن آؤٹ ہوئے۔
میچ میں کھانے کے وقفے کے فوری بعد امام الحق 20 رنز بنا کر پیٹ کمنز کی بال پر نیتھن لیون کو کیچ دے بیٹھے۔
ٹیم کا اسکور 60 رنز پر پہنچا تو اظہر علی 14 رنز پر اسٹارک کا شکار بنے جبکہ اگلی ہی بال پر فواد عالم صفر پر پویلین واپس لوٹے۔
ان کے بعد آنے والوں میں رضوان 6، فہیم 4، ساجد 5 اور حسن علی بغیر کوئی رن بنائے پویلین لوٹے۔
کپتان بابر اعظم 36 رنز کے ساتھ مہمان ٹیم کی تباہ کن بولنگ کا سامنا کرسکے، جبکہ پوری ٹیم 148 رنز پر ڈھیر ہوگئی۔
آسٹریلیا کی جانب سے مچل اسٹارک 3 وکٹیں لے کر نمایاں رہے، جبکہ ڈیبیو کرنے والے مچل سویپسن نے دو کھلاڑیوں کو آؤٹ کیا۔ ان کے علاوہ پیٹ کمنز، نیتھن لائیون اور کمرون گرین نے ایک ایک وکٹ لی۔
اس سے قبل مہمان ٹیم نے تیسرے دن کا کھیل گزشتہ روز کے اسکور 505 رنز 8 کھلاڑیوں آؤٹ سے شروع کیا تو شاہین شاہ نے 28 رنز بنانے والے مچل اسٹارک کو پویلین کی راہ دکھائی۔
ٹیم کا اسکور 556 رنز ہوا تو وکٹ پر 34 رنز بنا کر موجود کپتان پیٹ کمنز نے اننگز ڈیکلیئر کردی۔
پہلی اننگز میں آسٹریلیا کی جانب سے عثمان خواجہ 160 اور ایلکس کیری 93 رنز بنا کر نمایاں رہے۔
پاکستان کی جانب سے فہیم اشرف اور ساجد خان نے 2، 2 وکٹ حاصل کیے جبکہ شاہین آفریدی ، نعمان علی،حسن علی اور کپتان بابر اعظم نے 1،1 وکٹ حاصل کی۔