امر ناتھ یاترا کیلئے حفاظت کے سخت انتظامات کئے گئے ہیں:ڈولو

جموں//
جموں کشمیر کے چیف سکریٹری اٹل ڈولو نے ہفتہ کے روز کہا کہ امرناتھ یاترا کی حفاظت انتظامیہ کی اولین ترجیح ہے اور انہوں نے بھگوتی نگر بیس کیمپ میں انتظامات کا جائزہ لینے کیلئے ایک اجلاس کی صدارت کی۔
جموں زون کے ایڈیشنل ڈائرکٹر جنرل آف پولیس (اے ڈی جی پی) آنند جین کے ساتھ ڈولو نے سالانہ یاترا سے پہلے انتظامات کا جائزہ لینے کے لئے سخت حفاظتی بیس کیمپ کا دورہ کیا۔
۵۲روزہ یاترا۲۹جون کو اننت ناگ میں روایتی۴۸کلومیٹر کے نونوان،پہلگام راستے اور گاندربل میں۱۴ کلومیٹر چھوٹے لیکن کھڑے بالٹال راستے سے شروع ہوگی۔
چیف سیکریٹری نے کہا’’یاتریوں کے پہلے گروپ کو۲۸ جون کو یہاں (بھگوتی نگر) سے ہری جھنڈی دکھائی جائے گی اور یاترا اگلے دن (کشمیر میں) شروع ہوگی‘‘۔
چیف سکریٹری نے بیس کیمپ میں نامہ نگاروں کو بتایا کہ ہم انتظامات کا جائزہ لینے آئے ہیں اور مختلف متعلقہ محکموں کے افسروں کے ساتھ میٹنگ کی ہے۔انہوں نے مزید کہا’’تقریبا تمام انتظامات مکمل ہیں اور ہم زائرین کے لئے بہتر سہولیات کو یقینی بنانے کے لئے کام کر رہے ہیں تاکہ ان کے قیام کو آرام دہ بنایا جا سکے‘‘۔
ڈولو نے کہا کہ زائرین کے لئے لوڈمنٹ مراکز اور دیگر سہولیات کی گنجائش میں کئی گنا اضافہ ہوا ہے اور زائرین کی نگرانی کی جائے گی۔انہوں نے کہا’’مناسب حفاظتی اقدامات کیے جا رہے ہیں۔ جو کچھ بھی کرنا ہے وہ کیا جائے گا کیونکہ یاترا کی حفاظت ہماری اولین ترجیح ہے۔‘‘