شان ٹیٹ نے قومی ٹیم کو کراچی ٹیسٹ کے تیسرے روز جوائن کر لیا

پاکستان فاسٹ بولنگ کیلئے مشہور ہے، کوچنگ کرنے میں مزہ آئے گا، اپنا تجربہ پاکستانی بولرز کو منتقل کرنے کی کوشش کروں گا، گفتگو
کراچی// پاکستان کرکٹ ٹیم کے بولنگ کوچ اور آسٹریلیا کے سابق فاسٹ بولر شان ٹیٹ نے قومی ٹیم کو کراچی ٹیسٹ کے تیسرے روز جوائن کر لیا ہے۔شان ٹیٹ نے آئسولیشن مکمل ہونے کے بعد پاکستانی ٹیم کو جوائن کر لیا ہے، قومی ٹیم کے منیجر منصور رانا نے شان ٹیٹ کو پریکٹس جرسی پیش کی۔
اس موقع شان ٹیٹ کے مطابق میں پہلی بار پاکستان آیا ہوں، مجھے یہاں آکر اچھا لگ رہا ہے، میرے لیے سب چیزیں نئی ہیں، نئی ٹیم کا حصہ بننا ہمیشہ اچھا ہوتا ہے۔
شان ٹیٹ کے مطابق پاکستان ایک بڑی ٹیم ہے، امید ہے یہ ایک اچھا تجربہ ہو گا تاہم آغاز میں مجھے کھلاڑیوں کو جاننا ہو گا۔سابق آسٹریلین فاسٹ بولر کے مطابق گزشتہ 2 سال میں دیگر ٹیموں کے ساتھ اچھا تجربہ رہا، میں اپنے کیرئیر میں مختلف ملکوں میں کھیلا ہوں، پی ایس ایل سے بھی منسلک رہا ہوں۔انہوںنے کہاکہ پاکستان فاسٹ بولنگ کیلئے مشہور ہے، یہاں کوچنگ کرنے میں مزہ آئے گا، اپنا تجربہ پاکستانی بولرز کو منتقل کرنے کی کوشش کروں گا۔