ہندوستانی ٹیم کا ہیڈ کوچ بننے کے لیے رابطہ کیا گیا تھا: پونٹنگ

نئی دہلی// انڈین پریمیئر لیگ (آئی پی ایل) میں دہلی کیپٹلز کے کوچ رکی پونٹنگ نے کہا ہے کہ ان سے ہندوستانی ٹیم کا ہیڈ کوچ بننے کے لیے رابطہ کیا گیا تھا۔
پونٹنگ نے یہ بات آئی سی سی ریویو سے گفتگو کرتے ہوئے کہی۔ انہوں نے کہا کہ میں نے اس سے متعلق بہت سی رپورٹیں دیکھی ہیں۔ عام طور پر یہ چیزیں سوشل میڈیا پر آپ کے علم سے پہلے ہی سامنے آجاتی ہیں۔ آئی پی ایل کے دوران اس حوالے سے مجھ سے کئی بار بات کی گئی تاکہ یہ معلوم کیا جا سکے کہ میں اس کردار میں دلچسپی رکھتا ہوں یا نہیں۔
انہوں نے کہاکہ “میں یقینی طور پر سینئر قومی ٹیم کی کوچنگ کرنا پسند کروں گا۔ لیکن اس وقت میرے پاس اور کام ہے اور میں اپنا وقت گھر کے لیے بھی دینا چاہتا ہوں۔ سب جانتے ہیں کہ اگر آپ ہندوستانی ٹیم کے کوچ ہیں تو آپ آئی پی ایل میں اپنی خدمات فراہم نہیں کر سکتے۔ قومی ٹیم کی کوچنگ ایک ایسا کام ہے جس میں سال کے 10 سے 11 ماہ لگتے ہیں۔ اس وقت میں جس قسم کی زندگی گزار رہا ہوں اس کو دیکھتے ہوئے یہ کردار میرے طرز زندگی میں فٹ نہیں آتا۔
انہوں نے کہاکہ “میرا خاندان آئی پی ایل کے آخری پانچ ہفتوں تک میرے ساتھ تھا، وہ سب ہر سال میرے ساتھ ہندوستان آتے ہیں۔ جب میں نے اپنے بیٹے کو بتایا کہ مجھے کوچ کے عہدے کی پیشکش ہوئی ہے تو اس نے بغیر سوچے سمجھے اسے قبول کرنے کو کہا۔ انہوں نے کہا کہ وہ آئندہ چند سالوں میں ہندوستان کا دورہ کرنا پسند کریں گے۔ میرا خاندان ہندوستان آنا پسند کرتا ہے اور انہیں یہاں کی کرکٹ کلچر بھی پسند ہے۔ لیکن ابھی یہ میرے طرز زندگی میں فٹ نہیں ہے۔
گوتم گمبھیر کو بھی حال ہی میں بی سی سی آئی نے ہیڈ کوچ کے عہدے کے لیے رابطہ کیا تھا۔ اس دوڑ میں اسٹیفن فلیمنگ اور جسٹن لینگر کے نام بھی چل رہے ہیں۔
قابل ذکر ہے کہ پونٹنگ اس وقت ہوبارٹ ہریکینز کے ہیڈ آف اسٹریٹیجی ہیں اور انہوں نے ایم ایل سی میں ہیڈ کوچ کی حیثیت سے واشنگٹن فریڈم کے ساتھ دو سالہ معاہدہ بھی کیا ہے۔ ایم ایل سی کا دوسرا سیزن آنے والے ٹی ٹوئنٹی ورلڈ کپ کے فوراً بعد شروع ہوگا۔ پونٹنگ اس سے قبل آسٹریلیا کی ٹی۔ٹوئئنٹی اور ون ڈے ٹیموں کے ساتھ بھی کام کر چکے ہیں۔
سابق آسٹریلوی کپتان رکی پونٹنگ کے بعد اینڈی فلاور نے بھی بھارتی ٹیم کی کوچنگ میں بھی عدم دلچسپی ظاہر کردی۔
پاکستان سپر لیگ (پی ایس ایل) کی معروف فرنچائز ملتان سلطانز کے ہیڈکوچ اور سابق زمبابوین کرکٹر اینڈی فلاور کا کہنا ہے کہ وہ بھارتی ٹیم کے ہیڈکوچ کی حثیت سے کام کرنے کا ارادہ نہیں رکھتے۔
آئی پی ایل میں رائل چیلنجرز بنگلورو کے کوچ کے طور پر خدمات سرانجام دینے والے اینڈی فلاور نے مزید کہا کہ بھارتی ٹیم کی کوچنگ کیلئے اپلائی نہیں کیا اور اسوقت فرنچائز ٹیموں میں اپنی شمولیت سے خوش ہوں۔
انہوں نے کہا کہ کئی بڑی ٹیموں کیساتھ بطور ہیڈکوچ منسلک رہا ہوں تاہم میری پوری توجہ فرنچائز کرکٹ ٹیموں کی کوچنگ پر ہے۔
قبل ازیں سابق آسٹریلوی کپتان رکی پونٹنگ نے انکشاف کیا تھا کہ ہندوستانی ٹیم کا ہیڈکوچ بننے کی آفر کی گئی تھی تاہم فل ٹائم کوچنگ میں دلچسپی نہیں رکھتا البتہ فرنچائز سطح پر کوچنگ کیلئے دستیاب ہوں۔