کوٹھی باغ پولیس اسٹیشن شبانہ آگ‘عمارت کو جزوی نقصان

سرینگر//
جموں وکشمیرکے دارلخلافہ سری نگر کے ریذیڈنسی روڑ پر واقع کوٹھی باغ پولیس اسٹیشن شبانہ آگ کی واردات کے دوران خاکستر ہوا ہے جبکہ آگ بجھانے کی کارروائی کے دوران فائر اینڈ ایمرجنسی محکمہ کا ایک اہلکار بھی زخمی ہوا ہے ۔
بتادیں کہ۱ ۸مئی کو سری نگر میں ہی ٹریفک پولیس ہیڈ کواٹر کی عمارت بھی آگ کی ایک پُر اسرار واردات کے دوران خاکستر ہوئی۔
یو این آئی اردو کے نامہ نگار نے بتایا کہ ریذیڈنسی روڑ سری نگر میں جمعرات اور جمعے کی درمیانی شب کوٹھی باغ پولیس تھانے کی عمارت سے آگ نمودا رہوئی جس نے آناً فاناً پوری عمارت کو لپیٹ میں لے لیا۔
فائر اینڈ ایمرجنسی کے اہلکار فوری طورپر جائے موقع پر پہنچے اور آگ بجھانے کی کارروائی شروع کی تاہم بھیانک آتشزدگی کے باعث اُنہیں کافی دقتوں کا سامنا کرناپڑا ۔
نامہ نگار نے بتایا کہ۲۱فائر ٹینڈروں کی مدد سے بالآخر آگ پر قابو پایا گیا تاہم آتشزدگی کی اس واردات کے دوران پولیس اسٹیشن کی اوپری منزل پوری طرح سے خاکستر ہوئی جبکہ پہلی منزل کو بھی جزوی نقصان پہنچا ہے ۔
آگ بجھانے کی کارروائی کے دوران محکمہ فائر اینڈ ایمرجنسی کا ایک اہلکار جس کی شناخت انصار احمد کے بطور ہوئی ہے زخمی ہوا اور اُس کو علاج ومعالجہ کی خاطر نزدیکی ہسپتال منتقل کیا گیا۔ذرائع نے بتایا کہ پولیس تھانے میں موجودہ اسلحہ کو بروقت باہر نکالا گیا تاہم کچھ ریکارڈ خاکستر ہوا ہے ۔
ایس ایس پی سرینگر راکیش بلوال اور دوسرے سینئر آفیسران جائے موقع پر پہنچے اور صورتحال کا جائزہ لیا۔پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی ہے ۔
واضح رہے کہ۱ ۸مئی کو سری نگر میں ہی ٹریفک پولیس ہیڈ کواٹر کی عمارت بھی شبانہ آگ کی واردات کے دوران خاکستر ہوئی ۔