پونچھ: تیار کیا گیا ٹیولپ گارڈن سیاحوں کیلئے کھول دیا گیا

جموں//
جموں و کشمیر کے ضلع پونچھ کی کرشن چندر پارک میں تیار کئے گئے باغ گل لالہ کو منگل کے روز سیاحوں کے لئے کھول دیا گیا۔
ضلع مجسٹریٹ پونچھ محمد یاسین چودھری نے باغ کا دورہ کرکے اس کا افتتاح کیا۔
اس موقع پر انہوں نے میڈیا کو بتایا کہ کرشن چندر پارک میں دو سال قبل باغ گل لالہ کو محکمہ فلوری کلچر نے تیار کیا تھا اور اس کو عوام کے لئے کھول دیا گیا تھا۔انہوں نے کہا کہ اس سال متعلقہ محکمے نے اس میں مختلف قسموں کے نئے ٹیولپ بلب لگائے ہیں۔
چودھری کا کہنا تھا کہ ضلع کی دیگر پارکوں کو بھی مزید خوبصورت بنانے اور ان کی دیکھ ریکھ کو یقینی بنایا جائے گا۔انہوں نے کہا کہ ہماری کوشش ہے کہ لوگوں کو ایک چھا ماحول ملے ۔
محکمہ فلوری کلچر کے ایک افسر نے بتایا کہ کرشن چندر پارک میں تیار کیا گیا یہ ٹیولپ گارڈن جوبن پر ہے ۔انہوں نے کہا کہ آنے والے دنوں میں ضلع کی دوسری پارکوں کو بھی مزید سجایا سنوارا جائے گا۔انہوں نے لوگوں سے اپیل کی کہ وہ اس پارک کو دیکھنے کے لئے آئیں۔
باغ میں موجود ایک طالب نے بتایا’’میں نے ٹیولپ گارڈن فلموں میں دیکھا تھا لیکن آج اپنے علاقے میں اس باغ کی سیر سے محظوظ ہوا تو مجھے بہت کی خوشی ہوئی‘‘۔
انہوں نے کہا’’اب یہاں کے لوگوں کو سری نگر جانے کی ضرورت نہیں ہے وہ اپنے علاقے میں ہی ایک خوبصورت ٹیولپ گارڈن کی سیر سے لطف اندوز ہو سکتے ہیں‘‘۔
حکام کا کہنا ہے کہ اس باغ میں مختلف قسموں کے۱۴ہزار۵سو بلب لگائے گئے ہیں۔انہوں نے کہا کہ گرچہ یہ سری نگر کے ٹیولپ گارڈن کے مقابلے میں کافی چھوٹا ہے تاہم اس کی خوبصورتی بھی قابل دید ہے ۔
بتادیں کہ سرینگر کے جھیل ڈل کے کناروں پر واقع ایشیا کے سب سے بڑے باغ گل لالہ کو بھی۲۳مارچ سے سیاحوں کے لئے کھول دیا جائے گا۔
متعلقہ حکام کے مطابق سیاحوں کیلئے اس باغ میں امسال۷۳اقسام کے۷ء۱ملین ٹیولپ لگائے گئے ہیں۔