اننت ناگ ، بارہ مولہ اور شوپیاں میں پانچ منشیات فروش گرفتار

سرینگر//
منشیات کا کاروبار کرنے والوں کے خلاف اپنی مہم جاری رکھتے ہوئے جموں وکشمیر پولیس نے اننت ناگ ‘بارہمولہ اور شوپیاں میں دو سگے بھائیوں سمیت پانچ افراد کو حراست میں لے کر ان کے قبضے سے ممنوع نشیلی اشیاء برآمد کرکے ضبط کی ہے ۔
پولیس کے ایک ترجمان نے بتایا کہ اننت ناگ میں دو منشیات فروشو ں کو گرفتارکر کے اب کے قبضے سے۵ء۵کلو گرام چرس پاوڈر برآمد کی گئی۔
منشیات فروشوں کی شناخت ہمایو بشیر، عادل بشیر پسران بشیر احمد گنائی ساکن کے کلان کے بطور ہوئی ہے ۔
ترجمان نے مزید بتایا کہ ایس ایچ او بارہ مولہ کی سربراہی میں پولیس ٹیم نے درنگہ بل کراسنگ کے نزدیک ناکہ لگایا جس دوران مشتبہ نوجوان نے پولیس ٹیم کو دیکھتے ہی راہ فرار اختیار کرنے کی کوشش کی تاہم بعد ازاں اس کی گرفتاری عمل میں لائی گئی۔
ان کے مطابق گرفتار نوجوان کے قبضے سے ۱۴۰گرام چرس برآمد کرکے اس کو فوری طورپر حراست میں لیا گیا ۔پولیس نے منشیات فروش کی شناخت محمد حسین لون ولد عبدالحد ساکن جل شری بارہ مولہ کے بطور کی ۔
ادھر پولیس نے پٹن میں برکت حسین ڈار عرف برکت جھٹکی ولد غلام حسن ساکن ژینہ بل سنگھ پورہ پٹن کو دھر دبوچ کر اس کے قبضے سے۹۰گرام چرس برآمد کیا۔
شوپیاں پولیس نے تلرن امام صاحب کے نزدیک ناکہ چیکنگ کے دوران مشتبہ نوجوان کو روک کر اس کی تلاشی لی جس دوران اس کے قبضے سے۳ء۱کلو گرام ممنوع نشیلی اشیاء اور۳۰گرام بھنگ برآمد ہوئی۔
منشیات فروش کی شناخت فیاض احمد ملہ ولد ثنااللہ ملہ ساکن وزیر چیک سنگرن کے بطور کی گئی ہے ۔
دریں اثنا پولیس نے عوام الناس سے اپیل کی ہے کہ وہ منشیات کا کاروبار کرنے والوں کے بارے میں قانون نافذ کرنے والے ادارے کو مطلع کریں۔
اس دوران پولیس نے شمالی کشمیر کے ضلع بارہمولہ میں دو بد نام زمانہ منشیات فروشوں کی لاکھوں روپیے مالیت کی غیر منقولہ جائیدادوں کو ضبط کیا ہے ۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ بارہمولہ پولیس نے دو منشیات فروشوں کی قریب۶۰لاکھ روپے لاگت کی جائیدادوں جن میں ایک یک منزلہ رہائشی مکان اور ایک دو منزلہ شاپنگ کمپلیکس شامل ہے ، کو قرق کر دیا۔
ترجمان نے ان منشیات فروشوں کی شناخت محمد ایوب شاہ اور غلام محمد شاہ عرف گلشن پسران عبد الخالق ساکن لڈورہ رفیع آباد بارہمولہ کے طور پر کی گئی ہے ۔
بیان میں کہا گیا کہ یہ کارروائی این ڈی پی ایس ایکٹ کے متعلقہ دفعات کے تحت انجام دی گئی۔انہوں نے کہا کہ تحقیقات کے دوران جائیداد کی شناخت غیر قانونی طور حاصل شدہ جائیداد کے طور پر ہوئی ہے ۔
ترجمان کا کہنا تھا’’یہ جائیداد پہلی نظر میں منشیات فروشوں کی طرف سے نشہ آور اور ادویات اور سائیکو ٹراپک مواد کی غیر قانونی اسمگلنگ سے حاصل کی گئی تھی‘‘۔بیان کے مطابق لوگوں نے پولیس کی اس کارروائی کی سراہنا کی ہے ۔
قابل ذکر ہے کہ بارہمولہ میں سال رواں کے پہلے مہینے یعنی ماہ جنوری کے دوران این ڈی پی ایس ایکٹ کے تحت۲۴مقدمے درج کرکے۳سخت گیر منشیات فروشوں سمیت ۳۹منشیات فروشوں کو گرفتار کیا ہے اور ان کی تحویل سے لاکھوں روپیوں کا نشہ آور مواد ضبط کیا ہے ۔
ضلع میں منشیات کے خلاف وسیع پیمانے پر جنگ کو جاری رکھتے ہوئے پولیس نے سال ۲۰۲۳کے دوران این ڈی پی ایس ایکٹ کے تحت۲۶۴مقدمے درج کرکے۴۶۴منشیات فروشوں کو گرفتار کیا۔