ڈی جی پی سوائن کا منشیات اسمگلروں کیخلاف سخت کارروائی پر زور

جموں//
جموں و کشمیر کے ڈائرکٹر جنرل آف پولیس‘ آر آر سوائن نے مرکز کے زیر انتظام علاقے میں منشیات فروشی میں ملوث مجرموں کے خلاف سخت اور منصوبہ بند کارروائی کا مطالبہ کیا ہے۔
سوائن نے یہاں ایک ماہانہ کرائم ریویو اجلاس سے خطاب کرتے ہوئے کہا’’(منشیات) کی تجارت انتہائی خطرناک ہے، کیونکہ یہ نہ صرف نوجوان نسل کو تباہ کرتی ہے بلکہ اسے دہشت گرد سرگرمیوں کی حمایت کیلئے فنڈز جمع کرنے کیلئے بھی استعمال کیا جاتا ہے‘‘۔
ڈی جی پی نے افسران کو ہدایت کی کہ منشیات کے کاروبار میں ملوث مجرموں کے خلاف سخت اور منصوبہ بند کارروائی کی جائے۔
سوائن نے منشیات فروشوں کے ساتھ ساتھ منشیات صارفین کا ریکارڈ برقرار رکھنے کی بھی ہدایت کی تاکہ زیادہ جامع انداز میں کارروائی شروع کی جاسکے۔
سوائن نے افسران پر زور دیا کہ وہ بار بار خلاف ورزی کرنے والی گاڑیوں کی ’ماسٹر لسٹ‘ بنائیں اور منشیات کی نقل و حمل میں ملوث ڈرائیوروں اور گاڑیوں کی انڈیکسنگ کرنے کی بھی ہدایت کی۔
پولیس سربراہ نے متاثرین، فروخت کنندگان اور ڈیلرز کی درجہ بندی پر زور دیا اور افسران پر زور دیا کہ وہ ماضی کے تجربات سے فائدہ اٹھاتے ہوئے آگے بڑھیں اور پس منظر میں روابط قائم کریں۔
اجلاس کے دوران ترجمان نے کہا کہ جرائم کے مقدمات بالخصوص منشیات اور مویشیوں کی اسمگلنگ کی تحقیقات کو بہتر بنانے اور نمٹانے کے کئی اہم پہلوؤں پر تبادلہ خیال کیا گیا۔
ڈی جی پی نے کہا’’کسی ضلع یا زون کی کرائم تصویر کو درج جرائم کے معاملوں کو نمٹانے کی شرح اور نمٹانے کے معیار کو اجاگر کرنا چاہئے، اور جرائم کو نمٹانے کی کارکردگی کو بہتر بنانے کے لئے، ہمیں مجرموں کا ایک جامع، تازہ ترین اور درست ڈیٹا بیس تیار کرنا ہوگا‘‘۔
سوائن نے کہا’’ایک مضبوط کرائم کیس ڈیٹا بیس تحقیقات کے لئے ڈیٹا کو استعمال کرنے میں مدد کرے گا۔
ڈی جی پی نے افسروں کو ہدایت دی کہ وہ گائے کے اسمگلروں کے خلاف سخت کارروائی کریں کیونکہ یہ کاروبار اکثر مجرموں اور غیر قانونی مواد کی نقل و حمل سمیت مختلف دیگر غیر قانونی سرگرمیوں سے منسلک ہوتا ہے۔
پولیس سربراہ نے کہا’’ان گاڑیوں کے مالکان کے خلاف سخت کارروائی شروع کی جانی چاہئے جن کی گاڑیاں تجارت کے لئے بار بار استعمال ہوتی ہیں‘‘۔
افسروں کی حوصلہ افزائی کیلئے ایک اضافی ترغیب کے طور پر ، ڈی جی پی نے اعلان کیا کہ تحقیقات میں غیر معمولی کارکردگی کا مظاہرہ کرنے والوں کو بہترین ضلع اور بہترین پولیس اسٹیشن کے طور پر انعام دیا جائے گا۔ (ایجنسیاں)