جھیل وولر میں۴سے۵لاکھ مہمان پرندے آچکے ہیں

سرینگر//
وادی کشمیر میں خشک موسمی صورتحال کے باعث گرچہ یہاں غیر مقامی سیاح مایوس نظر آرہے ہیں تاہم یہاں کی مشہور آبگاہوں کے خاموش اور پر سکون پانی پر ہزاروں کی تعداد میں مہمان پرندے موجود بود و باش کر رہے ہیں۔
شمالی کشمیر کے بارہمولہ اور باندی پور اضلاع پر پھیلے مشہور جھیل وولر میں رواں موسم سرما کے دوران فی الوقت۴ سے۵لاکھ مہاجر پرندے آ چکے ہیں اور ان مہمان پرندوں میں۷نئی نسلیں بھی شامل ہیں۔
وولر کنزرویشن اینڈ منیجمنٹ اتھارٹی (ڈبلیو یو سی ایم اے ) کے کوارڈینیٹر‘ عرفان رسول نے کہا’’اس وقت جھیل نقل مکانی کرنے والے جانوروں سے بھری ہوئی ہے اور آئے روز مختلف ممالک اور پڑوسی آبگاہوں سے مہاجر پرندوں کے جھنڈ یہاں آ رہے ہیں‘‘۔
رسول نے کہا’’جھیل وولر ہزاروں کی تعداد میں مہمان پرندوں کیلئے تین وجوہات کی بنا پر باعث کشش ہے ، اس جھیل کا پانی صاف و شفاف بھی ہے اور یہ پانی سے بھرا ہوا بھی ہے وادی میں جاری خشک موسمی صورتحال کی وجہ سے پڑوسی آبگاہوں جیسے ہائیگام، ہوکر سر، اور شالہ بگ میں پانی کی سطح انتہائی کم ہونے سے مہمان پرندے یہاں آئے ہیں‘‘۔
کوارڈینیٹر کا کہنا تھا’’جھیل کے گرد و پیش سخت چوکسی کے باعث پرندوں کے غیر قانونی شکار میں بھی کمی واقع ہوئی ہے اور اب پرندے اس وسیع آبگاہ کو محفوظ آمجگاہ سمجھتے ہیں‘‘۔
رسول نے کہا کہ اس جھیل کے صاف و شفاف پانی نے گذشتہ۱۲مہینوں کے دوران مہمان پرندوں کی کچھ نایاب نسلوں کو بھی اپنی جانب متوجہ کیا ہے ۔انہوں نے کہا کہ مہمان پرندوں میں سے بعض ایسے پرندوں کی نسلیں بھی آج یہاں موجود ہیں جو دہائیوں بعد یہاں آئی ہیں۔
ان کا کہنا ہے کہ اس وقت جھیل وولر میں موجود بیشتر پرندے روس، یورپ اور وسطی ایشیا سے آئے ہوئے ہیں۔
جھیل وولر ایک اتھلی جھیل ہے جس کی زیادہ سے زیادہ گہرائی۸ء۵میٹر ہے جبکہ یہ جھیل۱۳۰مربع کلو میٹر پر محیط ہے ۔
حکام کے مطابق یہ جھیل وادی میں مچھلی پیداوار کا نصف سے زیادہ یعنی ۶۰فیصد حصہ فراہم کرتی ہے اس کے علاوہ یہ جھیل متصل واقع کم سے کم۳۰دیہاتوں کیلئے لائف لائن کی حیثیت بھی رکھتا ہے ۔
ان کا کہنا ہے کہ وادی کے آبگاہ یورپ، جاپان، چین اور وسطی ایشیا سے آنے والے پرندوں کو پناہ دیتے ہیں۔
سرکاری اعداد و شمار کے مطابق سال۲۰۲۲۔۲۰۲۳میں۸سے۱۲لاکھ کے درمیان مہمان پرنے یہاں آئے جبکہ سال۲۰۲۱۔۲۰۲۲میں یہ تعداد۱۱سے ۱۲لاکھ کے درمیان رہی۔
ماہ اکتوبر سے اپریل کے درمیان دنیا کے مختلف حصوں سے مہمان پرندوں کا کشمیر آکر یہاں کی آبگاہوں میں ڈھیرہ زن ہونے کا سلسلہ سالہا سال سے تواتر کے ساتھ جاری ہے ۔
جھیل وولر ملک کے۴۲آبگاہوں میں سے ایک ہے جس کو رامسر سائٹ (جس کے معنی بین الاقوامی معیار کے جھیل ہیں) کے بطور نامزد کیا گیا ہے ۔
قابل ذکر ہے کہ وادی کشمیر میں۴سو آبگاہیں موجود ہیں جن میں سے۲۵بڑی اور نوٹیفائیڈ ابگاہوں میں پرندے موجود ہیں۔