بارہ مولہ میں دو منشیات فروش گرفتار :پولیس

سرینگر//
منشیات کا کاروبار کرنے والوں کے خلاف اپنا کریک ڈاؤن جاری رکھتے ہوئے بارہمولہ پولیس نے دو منشیات فروشوں کو دھر دبوچ کران کے قبضے سے ممنوع نشیلی اشیا ء برآمد کرکے ضبط کی۔
پولیس کے ایک ترجمان نے بتایا کہ بونیار پولیس نے چھلن بونیار کے نزدیک ناکہ چیکنگ کے دوران بشیر احمد راتھر ولد غلام حسن ساکن بمر بونیار کی گرفتاری عمل میں لا کر اس کے قبضے سے تیس گرام چرس جیسی اشیا ء برآمد کی۔
ترجمان نے مزید بتایا کہ ہاری ترٹھ پٹن کے نزدیک منگل کے روز پولیس نے ناکہ لگایا جس دوران فردوس احمد تیلی عرف بھائی ولد علی محمد ساکن کھور شریف آباد پٹن کو روک کر اس کی جامہ تلاشی لی گئی۔
پولیس ترجمان نے بتایا کہ تلاشی کے دوران مذکورہ شخص کے قبضے سے۱۰۵گرام چرس پاوڈر برآمد ہوئی ۔
پولیس نے معاملے کی نسبت کیس درج کرکے تحقیقات شروع کی ہے ۔