’ایم فل کوئی تسلیم شدہ ڈگری نہیں ‘یو جی سی کی یونیورسٹیوں کو ہدایت

نئی دہلی///
یونیورسٹی گرانٹس کمیشن (یو جی سی) نے بدھ کے روز یونیورسٹیوں کو ایم فل کورس پیش کرنے کے خلاف متنبہ کرتے ہوئے کہا کہ یہ تسلیم شدہ ڈگری نہیں ہے۔
یو جی سی سکریٹری منیش جوشی نے کہا’’یو جی سی کے علم میں آیا ہے کہ کچھ یونیورسٹیاں ایم فل (ماسٹر آف فلاسفی) پروگرام کے لئے نئی درخواستیں طلب کر رہی ہیں۔ اس سلسلے میں یہ بات سامنے لائی جاتی ہے کہ ایم فل کی ڈگری تسلیم شدہ ڈگری نہیں ہے۔
جوشی کاکہنا تھا’’یو جی سی (پی ایچ ڈی ڈگری دینے کے لئے کم از کم معیار اور طریقہ کار) ریگولیشن۲۰۲۲ کے ریگولیشن نمبر ۱۴میں واضح طور پر کہا گیا ہے کہ اعلی تعلیمی ادارے کوئی ایم فل پروگرام پیش نہیں کریں گے‘‘۔
کمیشن نے یونیورسٹیوں سے کہا ہے کہ وہ تعلیمی سال۲۰۲۳۔۲۰۲۴ کیلئے اس طرح کے کسی بھی ایم فل پروگرام میں داخلوں کو روکنے کے لئے فوری اقدامات کریں۔
جوشی نے کہا’’طلبا کو مشورہ دیا جاتا ہے کہ وہ کسی بھی ایم فل پروگرام میں داخلہ نہ لیں۔‘‘ (ایجنسیاں)