راجواری پونچھ اضلاع انسداد دہشت گردی کی کارروائی تیز کی جائے :راج ناتھ

جموں//
وزیر دفاع راج ناتھ سنگھ نے بدھ کے روز راجوری اور پونچھ اضلاع کی سیکورٹی صورتحال کاایک اعلیٰ سطحی میٹنگ کے دوران جائزہ لیا۔انہوں نے سیکورٹی ایجنسیوں کو ہدایت دی کہ سرگرم دہشت گردوں کے خلاف چلائے جارہے آپریشنز میں مزید شدت لائی جائے۔
سرکاری ذرائع نے بتایا کہ وزیر دفاع نے آرمی چیف جنرل منوج پانڈے، جموں وکشمیر کے لیفٹیننٹ گورنر منوج سنہا کے ہمراہ راج بھون جموں میں یونین ٹریٹری کی تازہ ترین سیکورٹی صورتحال کا جائزہ لیا۔
معلوم ہواہے کہ میٹنگ میں پولیس چیف آر آر سوئن، پیرا ملٹری فورس، بی ایس ایف اور دوسری سیکورٹی ایجنسیوں کے سربراہان کے ساتھ ساتھ سیول انتظامیہ سے وابستہ سینئر آفیسران بھی موجود رہے۔
ذرائع کے مطابق ڈیڑھ گھنٹے تک جاری رہنے والی اس میٹنگ کے دوران وزیر دفاع نے سیکورٹی ایجنسیوں پر زور دیا کہ راجوری اور پونچھ اضلاع میں سرگرم ملی ٹینٹوں اور ان کے سہولیت کاروں کے خلاف آپریشنز کا دائرہ مزید وسیع کیا جائے۔
سنگھ نے کہاکہ لوگوں کو اعتماد میں لے کر ہی اینٹی ٹیرر آپریشن شروع کئے جائیں تاکہ مذکورہ اضلاع میں ملک دشمن عناصر کے منصوبوں کو پوری طرح سے ناکام بنایا جاسکے۔
وزیردفاع کا مزید کہنا تھا کہ موجودہ مرکزی سرکار دہشت گردی کے خلاف زیرو ٹرولنس کی پالیسی پر کاربند ہے۔
سنگھ نے آفیسران پر زور دیا کہ لوگوں کا بھروسہ حاصل کرنے کی ضرورت ہے تاکہ دہشت گردی کے خاتمے کو یقینی بنایا جاسکے۔انہوں نے پونچھ اور راجوری میں حالات کو پوری طرح سے معمول پر لانے کی خاطر فوری طورپر اقدامات اٹھانے پر زور دیا۔
وزیر دفاع نے کہا کہ پر امن حالات میں رخنہ ڈالنے والے عناصر کو کسی بھی صورت میں برادشت نہیں کیا جائے گا۔انہوں نے ملی ٹینٹ مخالف آپریشنز کے دوران پیشہ وارانہ صلاحیتوں کو بروئے کار لانے کی ہدایت دی۔
فوج کے سینئر آفیسران نے وزیر دفاع راج ناتھ سنگھ کو سرگرم ملی ٹینٹوں کے خلاف چلائے جارہے آپریشنز کے بارے میں بریفنگ دی۔
باوثوق ذرائع کے مطابق میٹنگ کے دوران پونچھ میں شہری ہلاکتوں کا معاملہ بھی اٹھا، وزیردفاع نے سیکورٹی ایجنسیوں پر زور دیا کہ وہ ٹیررمخالف آپریشنز کے دوران عام شہریوں کے جان و مال کے تحفظ کو یقینی بنائیں۔
ر سنگھ نے کہاکہ عوام کو اعتماد میں لے کر ہی ملک مخالف عناصر کے خلاف آپریشنز کو تیز تر کیا جائے تاکہ راجوری اور پونچھ اضلاع میں حالات دوبارہ معمول پر آسکے۔انہوں نے مزید کہاکہ جہاں تک دہشت گردی کا تعلق ہے تو ان کے خلاف سختی سے نمٹنے کی ضرورت ہے لیکن یہ بات بھی ذہن میں ہونی چاہئے کہ آپریشنز کے دوران عام شہریوں کوکوئی گزند نہ پہنچے۔
وزیر دفاع نے میٹنگ کے دوران آفیسران پر زور دیا کہ دہشت گردوں کے خلاف نئی حکمت عملی اپنانے کی ضرورت ہے تاکہ انہیں جلدازجلد انجام تک پہنچایا جاسکے۔
ذرائع نے بتایا کہ میٹنگ کے دوران وزیر دفاع راج ناتھ سنگھ کو پونچھ کے بفلیاز میں جاری آپریشن کے بارے میں بھی مکمل جانکاری فراہم کی گئی۔