ڈی ویلیئرز نے آئی پی ایل اسٹارک اور کمنز کو مہنگے داموں خریدے جانے پر سوال اٹھادیا

دوبئی//
جنوبی افریقا کے سابق کپتان اے بی ڈی ویلیئرز نے انڈین پریمیئر لیگ میں آسٹریلوی بولرز مچل اسٹارک اور پیٹ کمنز کو سب سے مہنگے داموں خریدے جانے پر سوال اُٹھا دیا۔
سابق جنوبی افریقی کپتان نے کہا کہ کیا دونوں کھلاڑی اس معیار کے ہیں؟ کہ اُن کو اتنی قیمت میں خریدا جائے۔
سوشل میڈیا پر انٹرویو کے دوران اے بی ڈی ویلیئرز نے کہا کہ آسٹریلیا کے مچل اسٹارک اور پیٹ کمنز دونوں زبردست کھلاڑی ہیں لیکن کیا وہ اس قیمت پر خریدے جانے والے پلیئرز ہیں؟
ان کے خیال میں اس سال کی نیلامی میں ساری بات فاسٹ بولرز کی ضرورت کی رہی، جب ضرورت بڑھے گی تو قیمت بھی بڑھے گی لیکن یہ دیکھنا ہوگا کہ یہ دونوں فاسٹ بولرز اس قیمت کے ہیں؟
انڈین پریمیئر لیگ کی بولی میں فاسٹ بولر مچل اسٹارک کو کولکتہ نائٹ رائیڈرز نے سب سے مہنگے داموں 24 کروڑ 75 لاکھ میں خریدا اور پیٹ کمنز کو سن رائزرز حیدرآباد نے 20 کروڑ 50 لاکھ میں اپنی ٹیم کا حصہ بنایا ہے۔
انٹرویو میں ڈی ویلیئرز سے سوال ہوا، کیا آئی پی ایل فرنچائز ممبئی انڈینز نے دیگر ٹیموں سے زیادہ بہتر انتخاب کیا ہے تو سابق کپتان کا کہنا تھا کہ وہ اس سے اتفاق نہیں کرتے۔
کولکتہ نائٹ رائیڈرز، ممبئی انڈینز، چنئی سُپر کنگز اور دیگر ٹیموں نے آئی پی ایل میں بہترین کارکردگی دکھائی ہے، ان ٹیموں نے نیلامی میں بھی اچھا کیا ہے اور کوئی جذباتی پن نہیں اپنایا۔
ادھر انڈین پریمیئر لیگ (آئی پی ایل) آکشن کے دوران پنجاب کنگز کی اونر پریتی زنٹا غلطی کر بیٹھیں، کھلاڑیوں کے ایک جیسے ناموں کی وجہ سے وہ دھوکا کھا گئیں۔میڈیا رپورٹ کے مطابق گزشتہ دنوں آئی پی ایل سیزن 2024 کیلئے کھلاڑیوں کی آکشن کی تقریب منعقد ہوئی جس میں فرنچائزز نے اپنی ٹیم میں شامل کرنے کے لیے بہترین کھلاڑیوں کو کروڑوں روپے میں خریدا۔
انڈین پریمیئر لیگ آکشن کے دوران اس وقت دلچسپ صورتحال پیش آئی جب ایک جیسے نام والے دو پلیئرز کی خریداری کا وقت آیا۔پنجاب کنگز کی آنر پریتی زنٹا جو 19 سال کی ششانک سنگھ کو اپنی ٹیم میں شامل کرنا چاہتی تھیں تاہم غلطی سے 32 سال کے ششانک سنگھ کی بولی لگا کر انہیں20 لاکھ بھارتی روپوں کی بیس پرائس میں خرید لیا، جب انہیں اپنی غلطی کا احساس ہوا تب تک بولی ہوچکی تھی۔
پریتی زنٹا نے ہاتھ اٹھا کر اپنی لگائی بڈ بدلنا چاہی لیکن اس وقت دیر ہوچکی تھی، اینکر نے کہا کہ یہ پلیئر اب آپ کی ٹیم کا ہو چکا ہے۔19 سالہ سشانگ سنگھ تو ان سولڈ رہے تاہم 32 سالہ ششانک پنجاب کی ٹیم کا حصہ بن گئے۔اگلے دن پنجاب کنگز نے ایک بیان میں کہا کہ ہم اس ہی ششانک سنگھ کو اپنی ٹیم میں لینا چاہتے تھے۔32 سالہ ششانک سنگھ نے پنجاب کنگز کی جانب سے بیان جاری کرنے کے بعد کنفیوژن کو ختم کرنے اور خود پر اعتماد کرنے پر ٹیم کا شکریہ ادا کیا۔