بڈگام اور بارہمولہ میں جنگجو اور تین اعانت کار گرفتار

سرینگر//
جموں وکشمیر پولیس نے وسطی ضلع بڈگام اور بارہمولہ میں ایک جنگجو اور تین اعانت کاروں کو اسلحہ وگولہ بارود سمیت حراست میں لینے کا دعویٰ کیا ہے۔
ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ بارہمولہ پولیس، فوج کی ۴۶آر آر، سی آر پی ایف کی۵۳ویںبٹالین اور ایس ایس بی کی دو بٹالین کی ایک مشترکہ ٹیم نے بارہمولہ میں ہل ٹاپ چھردری میں حسب معمول ناکہ لگا دیا۔
ترجمان نے کہا کہ چیکنگ کے دوران سیکورٹی فورسز نے دو افراد کو مشکوک حالت میں ان کی طرف آتے ہوئے دیکھا۔
ان کا کہنا تھا کہ سیکورٹی فورسز کو دیکھتے ہی ان دو افراد نے جائے موقع سے فرار ہونے کی کوشش کی لیکن سیکورٹی فورسز نے مستعدی کا مظاہرہ کرکے دونوں کو دھر لیا۔
پولیس بیان میں کہا گیا کہ پوچھ گچھ کے دوران گرفتار شدگان نے اپنی شناخت عاشق حسین لون ولد غلام نبی لون ساکن حیدر محلہ بارہمولہ اور عزیر امین گنائی ولد محمد امین گنائی ساکن کنتھ باغ بارہمولہ کے طور پر ظاہر کی۔
بیان کے مطابق تلاشی کے دوران عاشق حسین کی تحویل سے ایک پستول، ایک پستول میگزین، نو ایم ایم پستول کی آٹھ گولیاں، دو ایچ ای۳۶گرینیڈ جبکہ عزیر امین کی تحویل سے دو یو بی جی ایل گرینیڈ بر آمد کئے گئے ۔
پولیس ترجمان نے بیان میں کہا کہ گرفتار شدہ جنگجوؤں نے یہ ہتھیار بارہمولہ اور متصل علاقوں میں جنگجویانہ کارروائیاں انجام دینے کے لئے غیر قانونی طور پر حاصل کئے تھے ۔انہوں نے کہا کہ پولیس نے اس ضمن میں بارہمولہ پولیس اسٹیشن میں ایک کیس درج کرکے مزید تحقیقات شروع کی ہیں۔
اس سے پہلے جموںکشمیر کے وسطی ضلع بڈگام کے ہارو علاقے میں سیکورٹی فورسز نے دو ملی ٹینٹ اعانت کاروں کو گرفتار کرنے کا دعویٰ کیا ہے ۔
پولیس کے ایک ترجمان نے بتایا کہ۶۲آر آر‘ ۴۳بٹالین سی آر پی ایف اور جموں وکشمیر پولیس نے مصدقہ اطلاع موصول ہونے کے بعد انصار الغزوت الہند نامی ممنوع ملی ٹینٹ تنظیم کے دو معاونین کو حراست میں لے لیا ہے ۔
ترجمان نے گرفتار شدگان کی شناخت عامر منظور بڈو ولد منظور احمد بڈو ساکن ڈانگر پورہ رازون اور شاہد رسول گنائی ولد غلام رسول گنائی ساکن پتر مولہ صفا پورہ گاندربل کے بطو رکی ہے ۔
پولیس ترجمان نے بتایا کہ مذکورہ اعانت کاروں کے قبضے سے ایک ہینڈ گرینیڈ ‘۲۵؍اے کے گولیوں کے راونڈ اور دوسرا قابل اعتراض مواد برآمد کرکے ضبط کیا گیا۔
پولیس نے معاملے کی نسبت ایف آئی آر زیر نمبر ۱۳۴کے تحت کیس درج کرکے مزید تحقیقات شروع کی ہے ۔