’نارکو ٹیررزم خطرہ بن رہا ہے‘: پولیس اور دیگر سیکورٹی فورسز کو موثر طریقے سے مقابلہ کرنا ہوگا:ایل جی

سرینگر//
جموں کشمیر کے لیفٹیننٹ گورنر‘ منوج سنہا نے کہا کہ نارکو ٹیررزم اور نفسیاتی جنگ دو بڑے خطرات کے طور پر ابھر رہے ہیں جن کا پولیس اور دیگر سیکورٹی فورسز کو موثر طریقے سے مقابلہ کرنا ہوگا۔
سنہانے کہا کہ جموںکشمیر پولیس ایک با صلاحیت فورس ہے اور یہ فورس یونین ٹریٹری کے وقار و آبرو کے تحفظ کے لئے کوئی کسر باقی نہیں چھوڑ رہی ہے ۔
لیفٹیننٹ گورنر نے ان باتوں کا اظہار بدھ کے روز شمالی کشمیر کے ضلع بارہمولہ کے شیری علاقے میں منعقدہ پولیس کی ایک پاسنگ آئوٹ پریڈ سے خطاب کے دوران کیا۔
ایل جی نے کہا’’ٹیکنالوجی دن بہ دن ترقی کر رہی ہے نارکو ٹیررزم اور نفسیاتی جنگ دو بڑے چلینجز ابھر کر سامنے آ رہے ہیں ان کا مقابلہ کرنے کیلئے پولیس اور سیکورٹی فورسز کو مل کر کام کرنا ہوگا‘‘۔
مختلف محاذوں پر لڑنے کیلئے جموںکشمیر پولیس کیلئے تعریفوں کے پل باندھتے ہوئے ان کا کہنا تھا’’جموں وکشمیر پولیس با صلاحیت فورس ہے اور اس نے یونین ٹریٹری کے وقار اور آبرو کے تحفظ کیلئے کوئی کسر باقی نہیں چھوڑی‘‘۔
سنہا نے کہا کہ گذشتہ تین برسوں کے دوران صورتحال میں کافی تبدیلی آئی ہے اور اب یہاں کا عام آدمی پر سکون زندگی گذار رہا ہے ۔
ایل جی نے کہا’’لیکن کچھ عناصر امن کو خراب کرنے کیلئے اپنا رول ادا کر رہے ہیں کیونکہ وہ غریب لوگوں کی خوشحال زندگی سے خوش نہیں ہیں‘‘۔
سنہا کا کہنا تھا کہ جموںکشمیر پولیس ایسے امن مخالف عناصر کے خلاف زیرو ٹالیرنس پالیسی اختیار کرنی چاہئے ۔
لیفٹیننٹ گورنر نے کہا کہ جموں کشمیر پولیس ایک طرف ٹیررزم کے خلاف نبرد آزما ہے تو دوسری طرف امن و قانون کی صورتحال کوبر قرار رکھے ہوئے ہے ۔انہوں نے کہا’’پولیس کو اس کے علاوہ دوسرے چیلنجز کا سامنا ہے جن میں سماجی جرائم اور عام پولیسنگ شامل ہیں میں یہ کہنا چاہتا ہوں کہ جموں و کشمیر پولیس ملک کی بہترین فورس ہے ‘‘۔
سنہا نے نوجوانوں کو مختلف کھیل سرگرمیوں کی طرف راغب کرانے میں پولیس کے وسیع پیمانے پر شروع کئے جانے والے سیوک ایکشن پروگرام کی سراہنا کی۔انہوں نے نئے پاس آئوٹس سے مخاطب ہو کر کہا’’آپ کو یہ عہد لینا چاہئے کہ آپ دہشت گردی کے خلاف لڑیں گے ‘‘۔
ایل جی نے ڈی ایس پی ہماریوں بٹ و دیگر پولیس اہلکاروں کو خراج عقیدت پیش کیا۔ان کا کہنا تھا’’جموں و کشمیر اور پوری قوم ان بہادروں کی مرہون منت ہے جنہوں نے قوم کے لئے اپنی جانیں نچھاور کیں۔‘‘