جی ٹونٹی کے بعد سیاحتی سیکٹر میں بڑی تبدیلی آئی

سرینگر//
محکمہ سیاحت کے سکریٹری ‘ڈاکٹر سید عابد رشید شاہ کا کہنا ہے کہ جی ٹونٹی ٹورزم اجلاس کے انعقاد کے بعد جموں و کشمیر کے سیاحتی شعبے میں بڑی تبدیلی رونما ہوئی ہے ۔انہوں نے کہا کہ حکومت۷۵نئے سیاحتی مقامات کو فروغ دے رہی ہے جہاں تمام تر ضروری انفراسٹرکچر کو دستیاب رکھا جائے گا۔
سکریٹری نے ان باتوں کا اظہار ہفتے کو یہاں نامہ نگاروں کے سوالوں کے جواب دینے کے دوران کیا۔انہوں نے کہا’’جی ٹونٹی اجلاس کے بعد جموں و کشمیر کے سیاحتی شعبے میں بڑی تبدیلی آئی اور اب لوگ قومی سطح اور بین الاقوامی سطح کے ایونٹس میں بڑھ چڑھ کر حصہ لے رہیں اور کہہ رہے ہیں یہ ایونٹس جموں و کشمیر میں ہی ہونے چاہئے ‘‘۔
شاہ کا کہنا تھا کہ حکومت۷۵نئے سیاحتی مقامات کو فروغ دے رہی ہے جہاں تمام تر ضروری انفراسٹرکچر کو دستیاب رکھا جائے گا۔
سیکریٹری سیاحت نے کہا کہ جس طرح موبائل نیٹ ورک کو یقینی بنانے کیلئے دودھ پتھری میں ٹاور قائم کیا گیا ہے اور اسی طرح یوسمرگ اور دیگر مقامات جہاں ضرورت ہے ، میں بھی ایسا کام انجام دیا جائے گا۔انہوں نے کہا کہ حکومت جموں و کشمیر کے ابھرتے ہوئے فنکاروں کو پیلٹ فارم فراہم کرنے کیلئے ہر ممکن اقدام کرے گی۔
شاہ کا کہنا تھا کہ کشمیر کی تاریخ پرانی ہے اور سرینگر ملک کا دوسرا قدیم ترین شہر ہے ۔انہوں نے کہا کہ ہماری ۴ہزار سالہ تاریخ ہے اور آرٹ کا یہاں ایک بڑا رول رہا ہے ۔