کشتواڑ///
لیفٹیننٹ گورنر منوج سِنہا نے کہا ہے کہ یو ٹی کی انتظامیہ مساوی ترقی اور تمام طبقوں کی ضروریات کو پورا کرنے کیلئے پر عزم ہے ۔
سنہا نے آج کشتواڑ کا دورہ کیا اور شری چندی ماتا مژھل شرائین پر حاضری دی۔
ایل جی نے دورے کے دوران عقیدت مندوں کو دی جانے والی سہولیات کا جائزہ لیا او رمقامی باشندوں کے وفود سے بھی اِستفساری گفتگو کی۔
لیفٹیننٹ گورنر نے گلاب گڈھ پڈر میں پی آر آئی نمائندوں اور شہریوں سے خطاب کیا اور کشتواڑ کی ہمہ گیر ترقی کیلئے جموںوکشمیر یوٹی اِنتظامیہ کی کوششوں کا اشتراک کیا۔
سنہا نے کہا کہ اِنتظامیہ مساوی ترقی ، کمیونٹیوں کی ضروریات کو پورا کرنے اور اِس بات کو یقینی بنانے کے لئے پُر عزم ہے کہ معاشرے کا کوئی بھی طبقہ پیچھے نہ رہے ۔
لیفٹیننٹ گورنر نے کہام’’گزشتہ تین برسوں میں ہم نے کشتواڑ کے لوگوں کے خدشات کو دور کرنے، روزگار کے مواقع کو بڑھانے اور دیہی علاقوں میں رابطے کو بہتر بنانے کیلئے بہت سے اقدامات کئے ہیں۔‘‘
سنہا نے کہا کہ تین دہائیوں کے وقفے کے بعد سنیما تھیٹر کی بحالی، بہتر سڑک اور مواصلاتی رابطے، بہتر بجلی کا بنیادی ڈھانچہ، بہتر صحت، کھیل اور تعلیمی سہولیات ضلع کے لوگوں کے معیار زندگی کو تبدیل کرنے کیلئے حکومتی عزم کا ثبوت ہیں۔
لیفٹیننٹ گورنر نے پوتر مژھیل ماتا کی یاترا کیلئے بنیادی ڈھانچے اور سہولیات کو مضبوط بنانے کیلئے کئے گئے اقدامات پر بات کرتے ہوئے عقیدت مندوں کیلئے ہموار اور بغیر کسی رکاوٹ کے یاترا کو یقینی بنانے کیلئے جموں وکشمیر یوٹی اِنتظامیہ کے عزم کا اعادہ کیا۔
ایل جی نے مزید کہا کہ سڑک، سولر اَنرجی اور عقیدت مندوںکیلئے خیمے والی رہائش کی تعمیر نے آمد کو بڑھاوا دیا ہے اور اس برس کی تعداد ایک لاکھ سے زیادہ یاتریوں کو عبور کر چکی ہے۔
لیفٹیننٹ گورنر نے نیلم کی کانوں کے سروے، جیمولوجیکل سٹیڈیز کیلئے تعاون فراہم کرنے کیلئے وزیر اعظم نریندر مودی اورمرکزی حکومت کا شکریہ ادا کیا۔
سنہا نے کہا کہ اگلے ایک برس میں ہم نیلم کی کانوں کو سائنسی طریقے سے نیلام کرنے کی پوزیشن میں ہوں گے جس سے مقامی معیشت کو فروغ ملے گا اور یہ جموں کشمیر کی ترقی میں اہم شراکت داروں میں سے ایک بن جائے گی۔
لیفٹیننٹ گورنر نے پی آر آئی اور مقامی لوگوں کی طرف سے بات چیت کے دوران پیش کئے گئے تمام عوامی مطالبات پر بروقت اور مناسب کارروائی کا یقین دلایا۔ اُنہوں نے پرنسپل سیکرٹریوں ہائر ایجوکیشن اور پبلک ورکس (آر اینڈ بی) کو بھی ہدایت دی کہ وہ تمام شراکت داروں کی مشاورت سے اپنے متعلقہ محکموں کے مسئلے کو جلد از جلد حل کرنے کے لئے ٹھوس اقدامات کریں۔
سنہانے کشتواڑ کی ترقی کو آگے بڑھانے کیلئے جموںوکشمیر یوٹی اِنتظامیہ کے تمام اَقدامات کی عمل آوری میں پی آر آئیز اور لوگوں کی فعال شرکت کی خواہش کی۔
لیفٹیننٹ گورنر نے ضلع کے نوجوانوں پر زور دیا کہ وہ حکومت کی ہوم سٹے سکیموں کے تحت مراعات حاصل کریں۔
ایل جی نے پڈر میں بدھ گونپا کا بھی دورہ کیاجہاں اُنہوںنے بھگوان بدھ کا آشیرواد حاصل کیا اور بدھ کمیونٹی کے ارکان سے بات چیت کی۔
لیفٹیننٹ گورنر نے کہا’’بدھ کمیونٹی ہمارے معاشرے کا ایک لازمی اور مساوی حصہ ہے۔ وسائل پر ان کے تمام حقوق ہیں۔ اِنتظامیہ کنبوں کی ہمہ گیر ترقی اور بااِختیار بنانے کے لئے ہر ممکن مدد فراہم کرے گی۔‘‘
اِس موقعہ پر گورنمنٹ ڈگری کالج اور ہمالین کلچرل سکول گلاب گڈھ کے طلباء نے پڈری اور بدھسٹ لوک رقص پیش کیا۔
