عدم اعتماد کی تحریک پرووٹنگ کے خوف سے اپوزیشن بھاگ گئی: مودی

نئی دہلی//
وزیر اعظم نریندر مودی نے لوک سبھا میں تحریک عدم اعتماد کو شکست دینے کے بعد آج پھر اپوزیشن پر حملہ کرتے ہوئے کہا کہ اپوزیشن تحریک عدم اعتماد پر ووٹنگ سے خوفزدہ تھی اوربحث کے درمیان میں ایوان سے بھاگ گئی۔
ویڈیو کانفرنس کے ذریعے مغربی بنگال میں علاقائی پنچایتی راج کونسل سے خطاب کرتے ہوئے مودی نے کہا کہ مرکز میں نیشنل ڈیموکریٹک الائنس (این ڈی اے ) حکومت کے خلاف اپوزیشن کی طرف سے پیش کی گئی تحریک عدم اعتماد لوک سبھا میں ناکام ہوگئی۔’’ حالات ایسے بن گئے کہ اپوزیشن کے لوگ بحث کے بیچ میں ہی ایوان سے بھاگ گئے ۔ سچ یہ ہے کہ وہ تحریک عدم اعتماد پر ووٹنگ سے خوفزدہ تھے ‘‘۔
مودی نے کہا کہ ملک نے اپوزیشن کو تحریک عدم اعتماد پر بحث سے ہٹتے دیکھا۔ انہوں نے کہا’’یہ مایوس کن ہے کہ ان افراد نے منی پور کے لوگوں کو بہت مایوس کیا ہے ۔ شروع سے ہی حکومت نے منی پور پر ایک وقف اور مرکوز بحث کی کوشش کی۔ افسوس کی بات ہے کہ ان کے مقاصد مختلف تھے ‘‘۔
وزیر اعظم نے مغربی بنگال میں ترنمول کانگریس کی قیادت والی حکومت پر حملہ کیا اور ریاست میں اپنی پارٹی کے کارکنوں کی جاری جدوجہد کو اجاگر کیا۔ انہوں نے ترنمول کانگریس پر خونی کھیل کھیلنے کا الزام لگاتے ہوئے کہا کہ حالیہ پنچایتی انتخابات میں بی جے پی امیدواروں کو فارم بھرنے سے روکنا‘ان کی شرکت کو روکنا اور جب بی جے پی امیدوار جیتنے میں کامیاب ہوئے تو پرتشدد حملوں کا سہارا لینا، یہ مغربی بنگال میں ترنمول کانگریس تشدد کی سیاست کی ایک مثال ہے ۔
مودی نے زور دے کر کہا کہ آزادی کے بعد مشرقی ہندوستان کو نظر انداز کرنے سے ملک کی ترقی کو سب سے زیادہ نقصان پہنچا ہے ۔ اس ترقیاتی فرق کو پر کرنے کی کوششوں کا ذکر کرتے ہوئے انہوں نے کہا کہ گزشتہ ۵برسوں میں غربت سے باہر آنے والے۵ء۱۳کروڑ لوگوں میں سے ایک اہم حصہ مشرقی ہندوستان سے ہے ۔ انہوں نے کہا ’’ ہمارے ملک میں پچھلے ۵۰برسوں سے یہ نعرہ دیا جا رہا تھا کہ غریبی ہٹاؤ۔ لیکن یہ نعرے لگانے والے غربت ختم نہ کر سکے ۔ فطری سوال یہ ہے کہ جو کام پانچ دہائیوں میں نہیں ہو سکا، وہ بی جے پی حکومت نے اتنے کم وقت میں کیسے کر دکھایا‘‘؟
اپنے نو سالہ دور اقتدار کے دوران مشرقی ہندوستان میں ہونے والی پیش رفت کا ذکر کرتے ہوئے وزیر اعظم نے کہا’’پورے ملک میں تقریباً۱۸ہزارگاؤں، جو پہلے بجلی سے محروم تھے ، اب حکومت نے روشن کر دیے ہیں۔ان میں سے تقریباً۱۳ہزارگاؤں صرف مشرقی ہندوستان میں تھے ۔ انہوں نے کہا کہ۱۵؍اگست۲۰۱۹کو ہم نے جل جیون مشن شروع کیا۔ اس کے آغاز کے دوران ملک کے ۲۰فیصد سے بھی کم دیہی گھرانوں کو نلکے کے پانی تک رسائی حاصل تھی۔ آج۶۰فیصد سے زیادہ دیہی گھرانوں کو نل کے پانی تک رسائی حاصل ہے ۔
مودی نے پروگرام کے دوران تمام کارکنوں سے گھر گھر قومی پرچم لہرانے اور ’ہر گھر ترنگا‘ مہم میں بڑھ چڑھ کر حصہ لینے کی اپیل کی۔ انہوں نے ملک کے شہیدوں کو خراج تحسین پیش کرنے کیلئے جاری امرت کلش یاترا سے گاؤں کو جوڑنے کے لئے بھی حوصلہ افزائی کی۔