انٹر نیٹ خدمات معطل اور نہ بندشیں عائد ہوں گی:بدھوری

سرینگر//
کشمیر کے ڈویڑنل کمشنر وجے کمار بدھوری نے ہفتہ کو کہا کہ کشمیر میں یوم آزادی کے موقع پر کوئی پابندی نہیں ہوگی جبکہ انٹرنیٹ خدمات اور دیگر سہولیات بھی آسانی سے کام کریں گی۔
یہاں اپنے دفتر کے چیمبر میں ایک نیوز کانفرنس سے خطاب کرتے ہوئے، بدھوری نے کہا کہ یوم آزادی کے پرامن انعقاد کو یقینی بنانے کے لیے تمام انتظامات کو حتمی شکل دے دی گئی ہے۔
صوبائی کمشنر نے مزید کہا کہ سرینگر میں مرکزی تقریب کے مقام کو جگہ کی کمی کے پیش نظر ایس کے اسٹیڈیم سے بخشی اسٹیڈیم میں تبدیل کردیا گیا ہے کیونکہ اس سال انتظامیہ کو اس تقریب میں لوگوں کی بڑی تعداد میں شرکت کی توقع ہے۔
بدھوری نے لوگوں کو کل صبح۶بجے بوٹینیکل گارڈن سے ترنگا ریلی میں شرکت کی دعوت دی اور۱۵؍ اگست کو ہونے والی مرکزی تقریب میں شرکت کی اپیل بھی کی اور کہا کہ پاس کی ضرورت نہیں ہے۔ انہوں نے کہا کہ یہ سب کے لیے کھلی دعوت ہے۔
صوبائی کمشنر نے کہا کہ کشمیر بھر میں۷۷ویں آزادی کی تقریبات کے پرامن انعقاد کو یقینی بنانے کے لیے ضروری سیکورٹی اور دیگر اقدامات کیے گئے ہیں۔