۲۰؍اگست تک موسم خشک و گرم رہنے کا امکان

سرینگر//
محکمہ موسمیات نے وادی کشمیر میں جہاں ماہ رواں کی۲۰تاریخ تک موسم خشک و گرم رہنے کی پیش گوئی کی ہے وہیں ماہرین موسمیات کے مطابق جموں کشمیر میں ماہ اگست کے دوران بارش معمول سے کم ہونے کا امکان ہے ۔
ماہرین موسمیات کا کہنا ہے کہ جموں کشمیر میں ماہ رواں کے پہلے دس دنوں کے دوران۵۱فیصد بارش کم ریکارڈ ہوئی ہے ۔
محکمہ موسمیات کے ایک ترجمان نے بتایا کہ وادی میں۲۰؍اگست تک موسم خشک اور گرم رہنے کا امکان ہے ۔انہوں نے کہا کہ اس دوران کہیں کہیں معمولی درجے کی بارشیں متوقع ہیں اور اس دوران دن کا درجہ حرارت۳۱سے۳۲ڈگری سینٹی گریڈ تک رہ سکتا ہے ۔
وادی کے معروف ماہر موسمیات فیضان عارف کا کہنا ہے کہ ماہ اگست کے دوران گرچہ کہیں کہیں ہلکی بارشوں کے مرحلوں کو خارج از امکان قرار نہیں دیا جاسکتا ہے تاہم بڑے پیمانے پر بارشیں متوقع نہیں ہیں۔
عارف نے کہا کہ رواں ماہ کے پہلے دس دنوں کے دوران بارشوں کی کمی ریکارڈ ہوئی ہے ۔ان کا کہنا تھا کہ ماہ اگست کے پہلے دس دنوں کے دوران۳۶ملی میٹر بارشیں ریکارڈ ہوئی ہیں جبکہ معمول کے مطابق۱ء۷۴ملی میٹر بارش ہونی چاہئے تھی جو۵۱فیصد کم ہے ۔
ماہر موسمیات نے کہا کہ جموں کشمیر میں مارچ سے جولائی تک اچھی بارشیں ہوئیں جو اوسطاً معمول سے زیادہ ریکارڈ کی گئی۔تاہم انہوں نے کہا کہ ماہ اگست کے دوران بارشوں کی کمی سے باغبانی شعبے پر زیادہ منفی اثرات مرتب نہیں ہوں گے ۔
محکمہ موسمیات کے ایک عہدیدار کے مطابق جموں وکشمیر میں سال رواں کے یکم جون سے۹؍اگست تک۳ء۳۳۷ملی میٹر کی اوسط بارش کے مقابلے میں۶ء۳۳۶ملی میٹر بارش ریکارڈ ہوئی ہے ۔
گرمائی دارلحکومت سرینگر میں اس سیزن کے دوران۴ء۲۶۸ملی میٹر بارش ریکارڈ ہوئی ہے جو معمول سے ۸۰فیصد زیادہ ہے ۔