سرینگر//
کرائم برانچ کشمیر (سی بی کے ) نے رائل سپرنگس گالف کورس سری نگر میں نوکری کے حصول کیلئے جعلی پیدائشی سرٹیفکیٹ پیش کرنے کے الزام میں ایک شخص کے خلاف چارج شیٹ دائر کی ہے ۔
سی بی کے کے ایک ترجمان نے اپنے ایک بیان میں کہا’’ایف آئی آر زیر نمبر۲۰۲۲/۵۷میں محمد صدیق قاضی ولد غلام محی الدین قاضی ساکن برین نشاط کے خلاف آر پی سی کے دفعات۴۶۱/۴۲۰؍اور۴۷۱کے تحت قابل سزا جرائم میں ملوث ہونے کے الزام میں سری نگر کی ایک عدالت میں چارج شیٹ دائر کی گئی‘‘۔
بیان میں کہا گیا’’اس مقدمے کے مختصر حقائق یہ ہیں کہ کرائم برانچ کشمیر کو رائل سپرنگس گالف کورس (آر ایس جی سی) سری نگر کے کچھ ملازموں کی طرف سے ایک شکایت موصول ہوئی جس میں الزام لگایا گیا کہ ملزم محمد صدیق قاضی جو آر ایس جی سی سرینگر میں بارمین کی حیثیت سے کام کر رہا ہے ، کی اصلی عمر۶۷برس ہے اور وہ محکمے میں ابھی بھی کام کر رہا ہے ‘‘۔
ترجمان نے کہا کہ اس سلسلے میں سال ۲۰۲۲میں پولیس اسٹیشن کرائم برانچ کشمیر میں ایک کیس درج کرکے تحقیقات شروع کی گئیں۔
ترجمان نے کہا’’تحقیقات کے دوران یہ بات ثابت ہوئی کہ ملزم نے محکمے میں تقرری کے وقت جعلی پیدائشی سرٹیفکیٹ پیش کی تھی جس کے نتیجے میں وہ غیر قانونی طور پر سبکدوشی کی اصلی عمر کی معیاد پوری ہونے کے باوجود بھی ملازمت کر رہا تھا‘‘۔
بیان میں کہا گیا کہ اس لئے عدالتی فیصلے کیلئے مجاز دائرہ اختیار کی عدالت میں چارج شیٹ پیش کی گئی۔
