اسمارٹ سٹی:سرینگر میں ترقیاتی کام کئے جارہے ہیں:جوشی

نئی دہلی//
یونین ہاؤسنگ اینڈ اربن ڈیولپمنٹ سیکریٹری منوج جوشی نے ہفتہ کو کہا کہ جموں و کشمیر کے مرکز کے زیر انتظام علاقے میں واقع شہر سرینگر کو اسمارٹ سٹی مشن کے تحت پھر سے بحال کیا جا رہا ہے ۔
جوشی نے اس سلسلے میں اسمارٹ سٹی مشن کے ایک ٹویٹ کو ٹیگ کرتے ہوئے کہاکہ ’’سرینگر کو اسمارٹ سٹی مشن کے تحت نئی شکل دی جا رہی ہے ۔ کل۱۲۵پروجیکٹوں پر ایک ہزار کروڑ روپے سے زیادہ خرچ ہو رہے ہیں۔ ریور فرنٹ ڈویلپمنٹ، سائیکل لین، نکاسی آب کا نظام اور پارکنگ بنائی جا رہی ہے جس کی وجہ سے سیاحوں کی تعداد میں بھی اضافہ ہو رہا ہے ‘‘۔
وفاقی وزیر نے کہا کہ ان منصوبوں کی وجہ سے ہندوستان کے تاج (سرینگر) کو ایک نئی شکل مل رہی ہے ۔ وہاں آنے والے سیاحوں کی تعداد کئی گنا بڑھ گئی ہے ۔
وزارت کی طرف سے ایک اور ٹویٹ میں کہا گیا ہے کہ روزانہ دس ہزارسیاح گنڈولا کی سواری کے لیے سرینگر کے گلمرگ کے سکی ریزورٹ کا رخ کرتے ہیں۔ سیاحوں کے مطابق گنڈولا پر سفر کرنا ایک انوکھا تجربہ ہے ۔
سری نگر کیلئے۹۸۰کروڑ روپے کے اسمارٹ سٹی پروجیکٹ کے تحت پورے شہر کو زیادہ قابل رسائی اور چلنے کے قابل بنایا جائے گا۔ اس کے تحت شہر میں۱۰۰؍الیکٹرک بسیں چلائی جائیں گی۔ حال ہی میں شہر میں بین الاقوامی سطح کی جی۔ٹوئنٹی کانفرنس کی ایک شاندار تقریب کا انعقاد کیا تھا۔
سرینگر کے میونسپل کمشنر اور سرینگر اسمارٹ سٹی پروجیکٹ لمیٹڈ کے چیف ایگزیکٹو آفیسر اطہر امیر خان نے حال ہی میں کہا تھا کہ شہر میں اسمارٹ سٹی پروجیکٹ کے تحت ۵۶کام مکمل ہوچکے ہیں۔ سال کے آخر تک بیشتر منصوبوں پر کام مکمل ہو جائے گا اور اگلے سال جون تک تمام کام مکمل ہو جائیں گے ۔