معین علی کی ٹیسٹ کرکٹ میں واپسی ممکن

لندن// انگلش آل راؤنڈر معین علی آسٹریلیا کے خلاف ایشز سے قبل ٹیسٹ کرکٹ میں واپسی پر غور کر رہے ہیں۔
ستمبر 2021 میں کھیل کے طویل ترین فارمیٹ سے ریٹائرمنٹ کا اعلان کرنے والے 35 سالہ کھلاڑی کے بارے میں کہا جاتا ہے کہ ٹیسٹ کرکٹ میں ممکنہ واپسی کے حوالے سے انگلینڈ کے کپتان بین اسٹوکس اور کوچ برینڈن میک کولم نے ان سے رابطہ کیا تھا۔
اسپنر جیک لیچ کمر کے نچلے حصے میں اسٹریس فریکچر کے باعث ایشیز سے باہر ہو گئے ہیں اور ان کے متبادل کے طور پر معین علی یہ ذمہ داری نبھانے کا سوچ رہے ہیں۔
برطانوی میڈیا کا کہنا ہے معین علی کو فیصلہ کرنے کے لیے کچھ وقت دیا گیا ہے۔
معین نے اپنا ٹیسٹ ڈیبیو 2014 میں کیا اور 64 ٹیسٹ میں 28.29 کی اوسط سے 2,914 رنز بنائے اور آف اسپن سے 195 وکٹیں حاصل کیں۔
انگلینڈ کے لیے لیچ کی چوٹ سیریز کی تیاری میں ان کے باؤلنگ ڈپارٹمنٹ کے لیے تازہ ترین دھچکا تھا، فاسٹ بولر جوفرا آرچر بھی کہنی کی چوٹ کی وجہ سے باہر ہو گئے تھے۔ ایشز 16 جون کو ایجبسٹن میں شروع ہوگی۔