کامیاب جی ٹونٹی اجلاس سے کشمیر کے متعلق غلط بیانیہ ختم ہو گیا: سنگھ

جموں//
مرکزی وزیر‘جتندرسنگھ کا کہنا ہے کہ جی ٹونٹی سربراہی اجلاس سے کشمیر کے متعلق غلط بیانیہ ختم ہوگیا۔انہوں نے جی ٹونٹی اجلاس کی کامیابی کیلئے سبھی متعلقین کا شکریہ ادا کیا۔
ان باتوں کا اظہا ر وزیر نے کٹھوعہ میں نامہ نگاروں سے بت چیت کے دوران کیا۔
سنگھ نے کہاکہ سرینگر میں جی ٹونٹی سربراہی اجلاس کامیاب رہا اور لوگوں نے مندوبین کا والہانہ استقبال کیا۔ان کے مطابق جس طرح سے کشمیر کے لوگوں نے اس اجلاس کا خیر مقدم کیا اس کی جتنی بھی تعریف کی جائے کم ہے ۔
مرکزی وزیر نے مزید بتایا کہ کشمیر کے لوگوں کو پچھلے تین دہائیوں سے دہشت گردی کے باعث مشکلات کا سامنا کرناپڑا۔
سنگھ نے کہاکہ کشمیر کا عام آدمی اب آگے بڑھنا چاہتا ہے ۔انہوں نے بتایا کہ جب بھی کوئی سیاح ملک کی سیر وتفریح پر آتا ہے تو اس کے ذہن میں تاج محل دیکھنے کی خواہش اور کشمیر جانے کی تمنا ہوتی ہے ۔
مرکزی وزیر نے مزید بتایا کہ جی ٹونٹی اجلاس سے کشمیر کے متعلق غلط بیانہ اب پوری طرح سے ختم ہو گیا ہے ۔انہوں نے بتایا کہ ہمیں پورا یقین ہے کہ جی ٹونٹی اجلاس سے جموں وکشمیر میں سیاحت کو فروغ ملے گا۔
سنگھ نے کہاکہ ملک کی مختلف ریاستوں میں جی ٹونٹی کے اجلاس ہوئے لیکن سری نگر میں جو میٹنگ ہوئی وہ کامیاب رہی ہے ۔