سرینگر///
وادی کشمیر کو ملک کے باقی حصوں کے ساتھ جوڑنے والی سرینگر،جموں قومی شاہراہ پر رام بن میں شدید بارشوں کے بعد کئی مقامات پر مٹی کے تودے اور چٹانیں کھسک آنے کے پیش نظر بدھ کے روز ٹریفک کی نقل و حمل بند کر دی گئی۔
ٹریفک ذرائع نے بتایا کہ شدید بارشوں کے باعث رام بن میں کیفٹیریا موڑم، مہاڑ و دیگر مقامات پر مٹی کے تودے اور چٹانیں کھسک آئیں جس کے بعد قومی شاہراہ پر ٹریفک کی نقل و حمل بند کر دی گئی۔انہوں نے کہا کہ قومی شاہراہ پر ٹریفک کی نقل و حمل بحال کرنے کے لئے کوششیں جاری ہیں۔
ان کا کہنا تھا کہ تاہم قومی شاہراہ اگلے احکامات تک ٹریفک کے لئے بند ہے ۔
ادھر جنوبی کشمیر کے ضلع شوپیاں کو صوبہ پونچھ کے پونچھ اور راجوری اضلاع کے ساتھ جوڑنے والا تاریخی مغل روڈ مسلسل بند ہے ۔
اس دوران حکام نے بدھ کو کرگل علاقے میں زوجیلا پاس کے قریب برفانی تودہ گرنے کے بعد سرینگر،لیہہ ہائی وے پر گاڑیوں کی آمدورفت معطل کر دی۔
کرگل کے سینئر سپرنٹنڈنٹ آف پولیس (ایس ایس پی) کے حوالے سے ایک مقامی خبر رساں ایجنسی نے اطلاع دی ہے کہ علاقے میں تازہ برف باری کے بعد زوجیلا پاس پر بجرین نالہ اور شیتن نالہ کے قریب برفانی تودے گرے۔
ایس ایس پی نے کہا کہ سڑک کو صاف کرنے کے لیے افراد اور مشینری کو سروس میں لگا دیا گیا ہے۔ان کاکہنا تھا’’زوجیلا محور پر مختلف مقامات پر برف باری اور برفانی تودے گرنے کی وجہ سے، احتیاطی اقدام کے طور پر آج اوپر کی طرف ٹریفک کی اجازت نہیں دی گئی‘‘۔
تاہم ان کا کہنا تھا کہ زوجیلا پاس پر معیاری گاڑیوں کو کلیئر کر دیا گیا ہے۔