کشتواڑ سڑک حادثے میں ۷مزدور از جان‘۳زخمی

جموں//
جموںکشمیر کے ضلع کشتواڑ میں بدھ کی صبح ایک سڑک سڑک حادثے میں۷مزدور ہلاک جبکہ۳دیگر زخمی ہوگئے ۔
یہ حادثہ داچھن علاقے میں ڈانگ ڈورو پاور پروجیکٹ کے نز دیک پیش آیا ہے ۔
سرکاری ذرائع نے بتایا کہ کشتواڑ میں داچھن کے علاقے میں ایک گاڑی جس میں ڈنگ ڈورو پاور پروجیکٹ پر کام کرنے والے مزدور سوار تھے ، حادثے کا شکار ہوگئی۔انہوں نے کہا کہ اس حادثے میں۷مزدور بر سر موقع ہی از جان جبکہ ۳دیگر زخمی ہوگئے ۔ان کا کہنا تھا کہ زخمیوں کو علاج و معالجے کے لئے ہسپتال منتقل کیا گیا۔
ہلاک شدگان کی شناخت سدیش سنگھ ساکن ڈوڈہ، اختر حسین ساکن پنجرادی ڈانگرو، عبدالرشید ساکن کشتواڑ، مبشر احمد ساکن ڈوڈہ، اتوا ساکن جھارکھنڈ، راہل ساکن جھار کھنڈ اور کرن کمان ساکن کشتواڑ کے بطور ہوئی ہے ۔
دریں اثنا مرکزی وزیر ڈاکٹر جتندرا سنگھ نے ٹویٹ کرتے ہوئے کہا’’ضلع مجسٹریٹ کشتواڑ ڈاکٹر دیوانش یادو کے ساتھ ڈانگ ڈورو ڈیم سائٹ پر پیش آئے سڑک حادثے کے بارے میں بات کی‘‘۔انہوں نے ٹویٹ میں مزید کہا’’اس حادثے میں۷؍افراد از جان جبکہ ایک شدید زخمی ہوا ہے ، زخمی کو علاج و معالجے کے لئے ضلع ہسپتال کشتواڑ یا جی ایم سی ڈوڈہ منتقل کیا گیا ہے ، ہر ممکن مدد فراہم کی جائے گی‘‘۔
پولیس نے اس ضمن میں ایک کیس درج کرکے تحقیقات شروع کی ہیں۔
اس دوران جموں وکشمیر کے لیفٹیننٹ گورنر‘ منوج سنہا نے حادثے پر گہرے دکھ کا اظہار کیا ہے ۔
لیفٹیننٹ گورنر نے اس المناک سڑک حادثے پر دکھ کا اظہار کرتے ہوئے اپنے ایک تعزیتی پیغام میں کہا’’میں غمزدہ خاندانوں کی خدمت میں تعزیت وتسلیت پیش کرتا ہوں اور زخمیوں کی فوری صحت یابی کیلئے دعا گو ہوں‘‘۔
سنہا نے کہا’’میں نے ضلع انتظامیہ کو ہدایت دی ہے کہ وہ متاثرین کو ہر ممکن مدد فراہم کریں۔‘‘
اس دوران جنوبی کشمیر کے پلوامہ ضلع کے اونتی پورہ علاقے میں بدھ کی شام ایک سڑک حادثے میں کم از کم تین سی آر پی ایف اہلکار زخمی ہو گئے۔
ایک اہلکار نے بتایا کہ نمبل اونتی پورہ میں قومی شاہراہ پر ایک تیز رفتار ٹرک سی آر پی ایف کے بنکر سے جا ٹکرایا۔
اہلکار نے کہا کہ اس واقعے میں۱۳۰ویں بٹالین کے سی آر پی ایف کے تین اہلکار زخمی ہوئے جنہیں علاج کیلئے اسپتال منتقل کیا گیا ہے۔
دریں اثناء پولیس نے واقعہ کا نوٹس لے لیا ہے۔